14 qarashada Jalpyulttyq sotsial-demokratiialyq partiiasy atynan QR Prezidenttigine kandidat Nurlan Áýesbaev Mańǵystaý oblysyna saparmen kelip, Janaózen qalasyndaǵy «Bilim-Innovatsiia» litseii ǵimaratynda sailaýshylarmen kezdesý ótkizdi, dep habarlaidy JSDP baspasóz qyzmeti.
Is-shara barysynda kandidat jinalǵan qaýymǵa óziniń sailaýaldy baǵdarlamasynyń basym baǵyttary jóninde baiandap berdi.
Nurlan Áýesbaevtyń pikirinshe, munai-gaz salasy el biýdjetiniń basym bóligin quraidy. Degenmen atalmysh óńir infraqurylym jaǵynan artta qalǵan aimaqtardyń biri bolyp sanalady. Munyń bári teńgerimsiz óńirlik saiasattyń saldary. JSDP-dan kandidat barlyq deńgeili, onyń ishinde oblystyq ákimderdi sailaýdy engizý arqyly bul tyǵyryqtan shyǵýǵa bolady dep esepteidi.
Reformalardyń biri retinde biýdjettik protsedýralardy jetildirý usynylady. Ár eldi mekende ózine tiesili ashyq biýdjet jasaqtalyp, naqty ýaqyt rejiminde onlain túrde memleket aqshasynyń qalai jáne qaida jumsalyp jatqandyǵy ashyq kórsetilip otyrylýy tiis.
Budan bólek Nurlan Áýesbaevtyń sailaýaldy baǵdarlamasynda qazaqstandyqtardyń ómir sapasynyń Standartyn engizý usynylady. Standartta azamattarymyzdyń sapaly tamaqtanýynan bastap, demalysyna deiingi barlyq qajettilikteri qarastyrylýy qajet.
