«Otandastar Qory» kommertsiialyq emes aktsionerlik qoǵamy Aqparattyq taldaý departamentiniń direktory Nurhan Jaliev Aýǵanstandaǵy etnikalyq qazaqtardy elge ákelý máselesi týraly pikir bildirdi, dep habarlaidy QazAqparat.
«Aýǵanstan qazaqtaryn kóshirýge bailanysty el ishinde túrli pikirler aitylyp jatyr. Biri jaqtasa, biri qarsy bolýda. Jaqtaýshylarǵa salsańyz, ondaǵy qazaqtyń bárin búginnen qaldyrmai dereý kóshirip ákelý kerek. Qarsy taraptyń oiynsha, Aýǵanstandaǵy qazaqtar kezinde týǵan jerin tastap, tarihi otanyn satyp ketkender. Sondyqtan olardy elimizge múldem jolatpaý kerek eken. Árine, Memleket basshysy ózi tapsyrma berip, qoldaý kórsetip otyrǵanda qiyn jaǵdaidaǵa qalǵan qandastarǵa qoldaý kórsetý óte oryndy», - deidi «Otandastar Qorynyń» ókili.
Onyń paiymynsha, negizinen Aýǵanstannyń soltústiktegi provintsiialarynda shashyrai qonystanǵan etnikalyq qazaqtardyń bárin Kabýldaǵy Qazaqstan elshiliginiń mańaiyna jinaýdyń ózi úlken másele.
«Olardyń Kabýlǵa deiingi joldaǵy qaýipsizdigin kim qamtamasyz etedi? Sondyqtan, qazirgi tańda Aýǵanstandaǵy Qazaqstan Respýblikasynyń elshiliginde qurylyp, Elshiniń tóraǵalyǵymen jumys istep jatqan arnaiy komissiianyń jumysyna sáttilik tileiik. Ol ońai jumys emes. Ýaqytty, muqiiattylyqty, jaýapkershilkti talap etedi. Ultyn anyqtaýda birinshi basymdyq qazaq tiline beriledi. Qazaq tilin bilip turǵan adamǵa suraq azdaý bolary sózsiz. Sosyn, shyǵý tegin, iaǵni rýy men jeti atasyn, ata-babalarynyń tarihyn bilý jaǵyn da eskergeni oryndy», - deidi sarapshy.
Sondai-aq, ol Aýǵanstandaǵy qazaqtardyń kóbi ol elge kommýnistik júieniń qysymyna kónbei, ultyn, tilin, bolmysyn saqtap, balalaryn aman alyp qalý jáne ózderi tiri qalý úshin aýyp barǵanyn eske salady.
«Aýǵan qazaqtarynyń basym kópshiligi táýelsizdik jyldarynda Qazaqstanǵa qonys aýdardy. 13 myńnan astam adam kelgen bolatyn. Biraq, bes saýsaq birdei emes qoi. Jaǵdaiy bolmai, ártúrli sebeptermen qalyp qoiǵandar bar. Olar kóp emes. Osy oraida aýǵan qazaqtary da tarihi taǵdyry ortaq birtutas qazaq ultynyń ajyramas bóligi ekenin umytpaýymyz abzal. Álemniń qai jerinde bolsa da, árbir qazaqtyń tarihi otany bar. Tarihi otanynan kez kelgen qandas baýyrymyz ózine pana jáne qorǵan taba alady. Ol otbasyndaǵy ákeniń mindeti ispettes, otannyń mindeti.
Osyndaida eldigimizdi, birligimizdi, myqtylyǵymyzdy kórsetpegende qashan jáne kimge kórsetemiz?», - dep túiindedi Nurhan Jaliev.
