Tokio Olimpiadasynyń qola júldegeri Nurislam Sanaevqa óńir basshysy Ońdasyn Orazalin páter kiltin tabys etti, dep habarlaidy "Ult aqparat" óńir basshysynyń baspasóz qyzmetine silteme jasap.
Oblys ákimi Ońdasyn Orazalin búgin Tokioda ótken jazǵy Olimpiada oiyndarynan oralǵan aqtóbelik sportshylarmen jáne olardyń jattyqtyrýshylarymen kezdesti. Olimpiadanyń qola júldegeri Nurislam Sanaevqa eki bólmeli páter kiltin syilady. Olimpiada oiyndaryna qatysqan balýan Meirambek Ainaǵulovqa, sýda júzýshi Diana Nazarovaǵa, sonymen qatar, sportshylardyń jattyqtyrýshylaryna óńir basshysy baǵaly syilyqtar tabystady.
«Sizder - elimizdiń maqtanyshysyzdar. Jas urpaqqa salaýatty ómir salty men sportty dáripteýde úlgi bola otyra baǵa jetpes úles qosasyzdar. Adal ári aianbai kúreskenderińiz úshin, batyldyqtaryńyz ben otansúigishtikterińizge shyn júrekten alǵys aitamyn», - dedi Ońdasyn Orazalin.
Olimpiadaǵa qatysýshylar oblys basshylyǵyna kásibi sportty qoldaǵany úshin alǵys aityp, josparlarymen bólisti.
«Qoldaǵany úshin halqyma sheksiz rizamyn. Jerlesterimniń qalai qarsy alǵandaryn kórip, Olimpiada júldegeri bolǵanymdy anyq sezindim. Otandastarymdy Parijde ótetin Olimpiadada altyn alqamen qýantý úshin budan da kóp daiyndalatyn bolamyn», - dedi Nurislam Sanaev.
Aita keteiik, palýan Iýsýp Batyrmyrzaev pen karateshi Nurqanat Ájiqanov, sonymen qatar Tokiodaǵy Olimpiada oiyndarynda Aqtóbe oblysy atynan shyqqan basqa da sportshylar týǵan jerge 11 tamyzda oralady. Sonymen birge sýda júzýshi Vitalii Hýdiakov Ystyqkól janynda ótip jatqan oqý-jattyǵý jiynyna kirisip te ketken.
