Erkin kúresten Tokio Olimpiadasynyń qola júldegeri Nurislam Sanaev jartylai finaldyq beldesýde úndistandyq Ravi Kýmardy ne úshin tistep alǵanyn aitty dep jazady Olympic.kz.
"Kýmardy ádeii tistegen joqpyn. Múmkin, jeńilip jatqanda qalai da utamyn degen oimen avtomatty túrde jasalǵan shyǵar. Dál sol kezde tistegenimdi sezgen de joqpyn.
Tek kilemnen túsken soń oilandym. Sýretterdi kórdim. Dereý qarsylasymnan keshirim suradym. Árine, kúres erejesinde qarsylasty tisteýge bolmaidy. Meniki aǵattyq.
Kilemdegi qyzýmen úndilik balýandy qalai tistep alǵanymdy da bilmei qaldym", - deidi ol.
Bul jait úndilikterdiń ashýyn keltirgenimen, UWW sportshynyń áreketine ádeii jasalmaǵan reaktsiia degen baǵa berip, qazaqstandyq balýanǵa qatysty tártiptik shara qoldanbaitynyn málimdegen.
Tokio Olimpiadasynda Nurislam Sanaev 57 kelide synǵa túsip, jartylai finalda Ravi Kýmardan jeńildi. Qola medal úshin ótken beldesýde bolgariialyq qarsylasynan basym tústi.
Eske sala keteiik, Tokio Olimpiadasynda Nurislam Sanaevtyń isine shaǵymdanǵan úndilik sportshy aqyry finalda ózi de reseilik sportshyny tistep alǵan bolatyn.
Odan bólek, 2012 jylǵy London Olimpiadasynda, kerisinshe úndi balýany Sýshil Kýmar qazaqstandyq Aqjúrek Tańatarovty qulaǵynan tistep alǵan edi.
Tóreshiler Kýmardy bul qylyǵy úshin jazalamaýdy uiǵarǵan. Úndistan ókili finalǵa joldama alyp, Aqjúrek Tańatarov Olimpiadanyń qola júldesine ie bolady.
