Shymkentte 21 jastaǵy Nurai Serikbaidyń ólimine qatysty qylmystyq is boiynsha sot úkimi shyqty, dep habarlaidy ult.kz.
Shymkent qalasynyń qylmystyq ister jónindegi mamandandyrylǵan aýdanaralyq soty Sherhan Aimahandy úsh bap boiynsha kináli dep tanydy. Atap aitqanda, ol nekege turýǵa májbúrleý, stalking, iaǵni adamdy qýdalaý jáne asa qatygezdikpen adam óltirý baptary boiynsha sottaldy.
Sot Aimahanǵa ómir boiyna bas bostandyǵynan aiyrý jazasyn taǵaiyndady. Jaza qylmystyq-atqarý júiesiniń tótenshe qaýipsiz mekemesinde óteledi.
Nurai Serikbai 2026 jylǵy 11 qańtarda Shymkentte qaza tapty. Tergeý materialdaryna sáikes, Aimahan buǵan deiin qyzdy óz erkinen tys alyp ketip, keiin ony ańdyǵan. Keiin Nuraiǵa pyshaqpen shabýyl jasap, oqiǵa ornynan qashyp ketken. Is materialdarynda oǵan 35 pyshaq jaraqaty salynǵany kórsetilgen.
Sot barysynda Sherhan Aimahan óz kinásin tolyq moiyndamady. Ol qylmysty affekt jaǵdaiynda jasaǵanyn aityp, oqiǵanyń keibir tustary esinde joq ekenin málimdegen.
Buǵan deiin memlekettik aiyptaýshy da sottan Aimahandy ómir boiyna bas bostandyǵynan aiyrýdy suraǵan. Prokýrordyń aitýynsha, sottalýshynyń jazasyn jeńildetetin mán-jailar anyqtalmaǵan.
Nuraidyń ólimi qoǵamda úlken rezonans týdyrdy. Marqumnyń týystary onyń qazasyna deiingi jaǵdailarǵa qatysty quqyq qorǵaý organdaryna birneshe ret júgingenin aityp, istiń tergelýine bailanysty suraqtar kótergen edi. Sonymen qatar bul oqiǵa Qazaqstanda stalking pen nekege májbúrleý máselesine qoǵam nazaryn aýdardy.
