Shymkentte 21 jastaǵy Nurai Serikbaidy óltirý isi sotta qarala bastady, dep habarlaidy ult.kz.
Shymkent qalalyq qylmystyq ister jónindegi mamandandyrylǵan aýdanaralyq sotynda qańtar aiynda kópshiliktiń jaǵasyn ustatqan qandy oqiǵa boiynsha sot protsesi bastaldy. Sot aldynda 21 jastaǵy Nurai Serikbaidy asa qatygezdikpen óltirdi dep aiyptalǵan 28 jastaǵy Sherhan Aimahan jaýap berip jatyr.
Iske sýdia Sammiddin Temiráliev tóraǵalyq etýde. Jábirlenýshi retinde marqumnyń ákesi Baýyrjan Saǵymbek tanylǵan. Alaida alǵashqy sot otyrysy aiyptalýshynyń densaýlyq jaǵdaiyna bailanysty keiinge shegerildi.
Tergeý materialdaryna sáikes, qaiǵyly oqiǵa biylǵy 11 qańtar kúni keshki ýaqytta bolǵan. Úiinen dúkenge shyqqan Nuraidy kúdikti jolda kútip turǵan. Tergeý nusqasy boiynsha, ol qyzdy kúshtep ustap alyp, birneshe jerinen pyshaq jaraqatyn salǵan. Aýyr jaraqat alǵan boijetken oqiǵa ornynda kóz jumǵan. Qylmystan keiin kúdikti izin jasyryp ketken.
Politsiia kúdiktini eki kúnnen keiin qolǵa túsirdi. Qazirgi tańda oǵan Qazaqstan Respýblikasy Qylmystyq kodeksiniń «Asa qatygezdikpen adam óltirý», «Stalking» jáne «Nekege turýǵa májbúrleý» baptary boiynsha aiyp taǵylǵan.
Bul qaiǵyly oqiǵa qoǵamda úlken rezonans týǵyzyp, áielderdiń qaýipsizdigi, qýdalaý (stalking) jáne turmystyq zorlyq-zombylyqtyń aldyn alý máselelerin qaitadan kún tártibine shyǵarǵan bolatyn. Aldaǵy sot otyrystarynda taraptardyń ýájderi tyńdalyp, barlyq dálelder jan-jaqty zerttelmek.
