Búgin Nur-Sultanda úsh avtobýs soqtyǵysyp, saldarynan eki adam qaza tapty.
Jolaýshylar avtobýsy qiylysta turǵan eki avtobýsqa qatty jyldamdyqpen kelip soǵylǵan. Birneshe avtokólik, sonyń ishinde jedel járdem kóligine de zaqym keldi.
Jantúrshigerlik jol apaty Uly dala kóshesi men Qabanbai batyr dańǵylynyń qiylysynda boldy.
53 jastaǵy avtobýs júrgizýshisi men 26 jastaǵy jolaýshy áiel oqiǵa ornynda kóz jumyp, taǵy 36 adam zardap shekken.
Zardap shekkenderge qajetti dári-dármek pen quiylatyn qan jetkilikti.
Bul týraly Nur-Sultan qalasynyń Qoǵamdyq densaýlyq saqtaý basqarmasynyń basshysy Kamaljan Nadyrov aitty.
«Jol apatynan keiin 36 adam meditsinalyq kómekke júgindi. Jedel meditsinalyq járdem brigadalary 36 adamdy qalalyq statsionarǵa jetkizdi. Olardyń 23-i kópbeiindi qalalyq aýrýhanaǵa, 2 naýqas - №1 qalalyq aýrýhanaǵa jáne bireýi - ortalyq jol aýrýhanasyna jetkizilgen», - dedi Kamaljan Nadyrov qala ákimdiginde ótken baspasóz máslihatynda.
8 adam jeńil jaraqatpen dárigerge kórindi. Zardap shekken 36 adamnyń arasynda balalar joq.
«Ázirge 1 naýqastyń jaǵdaiy óte aýyr, alty naýqastyń jaǵdaiy - qalypty aýyr dep baǵalandy. Segiz patsienttiń jaǵdaiy ortasha», - dedi basqarma basshysy.
Oqiǵa ornyna elorda ákimi Baqyt Sultanov ta bardy. Jol apatynyń sebepteri anyqtalýda.
Videolardy oqiǵa ornynda kýágerler túsirgen.
