Nur-Sultan qalasynda ornalasqan shaǵyn aýdandarǵa gaz taratý jelileri salynyp jatyr. Magistraldyq gaz qubyrynyń montajy aiaqtalý satysynda.
Búgin Elorda ákimi Altai Kólginov jelilerdi júrgizý barysyn tekserdi.
«Gaz qubyry Qazaqstannyń Tuńǵysh Prezidenti - Elbasy Nursultan Nazarbaevtyń tapsyrmasyna sáikes salynyp jatyr. Elordany odan ári damytý jónindegi keńeste Memleket basshysy Qasym-Jomart Toqaev qalany gazdandyrý protsesin baqylaýǵa alýdy tapsyrdy», - dep habarlandy ákimdiktiń Instagram paraqshasynda.
Elorda ákimi Altai Kólginov jumys qarqynyn tómendetpeý qajettigin atap ótti. Jelezodorojnyi eldimekeninde gaz taratý jelileriniń úshten biri salyndy. Sonymen birge bul jumystar Kóktal-1, Kóktal-2 jáne Agrogorodok eldimekenderinde júrgizilip jatyr.
2020-2023 jyldary qalanyń ónerkásiptik sektory men eldimekenderdi gazdandyrý 3 kezeńde ótedi: kelesi jylytý maýsymynda Kóktal-1, Kóktal-2, Agrogorodok, Promyshlennyi, Jeleznodorojnyi eldimekenderi gazben qamtylady. Ekinshi kezeńde Michýrino, Internatsionalnyi, Kúigenjar (1-2 IKQ), Telman (3 IKQ), Prigorodnyi, Garden Village jáne Family Village (4 IKQ) eldimekenderi qamtylady. Úshinshi kezeńde Ilinka (1-2-shi IKQ), Shubar (3-shi IKQ), Óndiris (4-shi IKQ) eldimekenderi gazdandyrylady.
Gaz ótkizý qaladaǵy ziiandy qaldyqtardyń 6 esege, qatty zattardyń – 40 myń tonnaǵa deiin azaiýyna múmkindik beredi.
