Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova koronavirýs juqtyrǵan 14 jańa naýqastyń jai-kúii týraly aityp berdi, dep habarlaidy QazAqparat.
«14 adamnyń barlyǵy bir reispen kelgen joq. Bes adam – qaladaǵy infektsiialyq bloktyń statsionarynda jatqan. Qalǵan 9 adam – epidemiologiialyq jaǵdaiy qolaisyz elderden kelgen jolaýshylardy tekserý barysynda tabyldy. Onyń ishinde 4 adam – Bas sanitarlyq dárigerdiń qaýlysy boiynsha epidemiologiialyq jaǵdaiy qolaisyz dep tanylǵan Italiia men Ońtústik Koreiadan kelgen», - dedi basqarma basshysy Ortalyq kommýnikatsiialar qyzmetindegi brifingte
Onyń aitýynsha, bir naýqas juqpaly aýrýlar aýrýhanasynda ortasha deńgeidegi Jedel respiratorlyq virýstyq infektsiia diagnozymen jatqan. Ony qosymsha tekserý barysynda koronavirýstyq infektsiia tabyldy jáne em taǵaiyndaldy.
«Barlyǵynyń jaǵdaiy qanaǵattanaralyq, klinikalyq belgiler joq. Barlyǵy Nur-Sultan qalasynyń kópbeiindi meditsinalyq ortalyǵynyń infektsiialyq statsionaryna jatqyzyldy», - dedi S. Qisyqova.
Aita keteiik, Nur-Sultanda koronavirýs boiynsha taǵy 14 jańa naýqas tirkeldi.
Osylaisha, qaýipti indetpen aýyrǵandar sany 27-ge jetti. Onyń ishinde 16 jaǵdai - Nur-Sultanda, 11 fakti - Almatyda tirkelgen.
Sondai-aq, Qazaqstanda tótenshe jaǵdai jariialanyp, azamattardyń 15 sáýirge deiin el aýmaǵynan shyǵýyna tyiym salyndy.
