QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar álemi komiteti elorda kóshelerinde júrgen or qoianǵa qatysty videoǵa pikir bildirdi, dep habarlaidy "Ult aqparat".
Áleýmettik jelide Ministrlikter úiiniń mańynda júrgen qoian týraly video tarady. Video avtory karantinniń tabiǵatqa oń áser etip jatqanyn, ań-qustardyń adamnan qoryqpaitynyn aitady.
«Shyn máninde tabiǵattyń jandanýyna karantinniń esh qatysy joq. Qoian, túlki, elik syndy jabaiy ańdar astanamyzda baiaǵydan bar», - dep jaýap berdi Orman sharýashylyǵy jáne janýarlar álemi komitetiniń baspasóz hatshysy Sáken Dildahmet.
Onyń aitýynsha, Ministrlikter úiiniń artynda, Aqorda jaqta shaǵyn orman bar. Videodaǵy qoian sol ormannan kelýi múmkin.
«Nur-Sultanda ań-qustyń túr-túri bar. 1997 jyly elordanyń jasyl beldeýi quryla bastady jáne Elbasynyń jyl saiyn tabiǵatqa qyrǵaýyl men elik jiberýi dástúrge ainaldy. Esil ózeninde sporttyq balyq aýlaýdy damytý, ózender júiesin saqtaý úshin jyl saiyn 200 myń shabaq jiberemiz. Odan bólek, sý betine aqqý, qaz, qoqiqazdar ýaqytsha qonaqtaidy. Qala ishi neǵurlym ormanǵa tolsa, soǵurlym ekologiialyq teńgerim saqtalady», - dedi Sáken Dildahmet.
Aita keteiik, agenttik tilshisi «video avtory karantin kezinde qydyryp júrgeni úshin jaýapqa tartylýy múmkin be?» degen suraqty Politsiia departamentine qoiǵan edi.
«Eger shyn máninde qydyrǵan bolsa, árine jaýapqa tartylady. Biraq, qazirgi ýaqytta ol kisi (video avtory - red.) týraly málimet joq», - dedi Nur-Sultan qalalyq Politsiia departamentiniń baspasóz hatshysy Elmira Sháýlenova.
