Qalada qatań sanitarlyq sharalar saqtala otyryp, qoǵamdyq kólik jumysy qaita jandandy, dep habarlaidy elorda ákimdiginiń resmi saity.
Búgin, 3 tamyzda elordada qoǵamdyq kólikter qaita júre bastady. Sonymen birge, CTS qyzmetkerlerimen marshrýttardyń derekterge negizdelgen jumys júktemesin jáne qozǵalys kestelerin modeldeý boiynsha taldaý júrgizildi.
«Búgin qoǵamdyq kólikter óz jumysyn bastady, biraq ázirge jedel marshrýttar men qala mańyndaǵy marshrýttardyń qozǵalysy toqtatyldy. Kóliktik baqylaý qyzmetkerleri qoǵamdyq kólikterde maska taǵý tártibiniń saqtalýyn qadaǵalaýda. Júrgizýshilerdiń maska taǵýy, avtobýstarda dezinfektsiia quraldary bolýy qadaǵalanady. Jaǵdai turaqty. Jolaýshylar legi ortasha deńgeide saqtalýda», - dedi «City Transportation Systems» JShS basqarma tóraǵasynyń orynbasary Baýyrjan Seiitov.
«Biz jumysymyzdy saǵyndyq. Barlyq jolaýshylar sanitartiia talaptaryn saqtaidy. Adamdar maskasyz kirip jatqan joq», - deidi № 1 avtobýs parkiniń júrgizýshisi Meiram Dáýletbekov.
Habarlanǵandai, 1 tamyzda Nur-Sultan qalasynyń ákimi Altai Kólginov karantin kezeńindegi qoǵamdyq kólikterdiń daiyndyǵymen tanysty. Jumys berýshiler men qala turǵyndarynyń ótinishi boiynsha 3 tamyzdan bastap avtobýstardyń qozǵalysy qaita jandandy. Avtobýstar saǵat 6:00-den 21:00-ge deiin júredi. Avtobýsqa otyrǵyzý tek aldyńǵy esik arqyly júzege asyrylady. Jol júrý aqysy qolma-qol aqshasyz tólemder arqyly jasalady.
Avtoturaqtardyń jumysyn jaqsartý úshin 100 elektr avtobýsy satyp alynyp, tapsyryldy, qala turǵyndarynyń tilekteri eskerilip, jańa baǵyttar ashyldy. Kóliktik baqylaý departamenti kún saiyn qoǵamdyq kólikte sanitariia normalaryn saqtaý boiynsha reid júrgizedi.
