Jańa kólikter elorda turǵyndaryna sapaly meditsinalyq kómek kórsetýge múmkindik beredi, dep habarlaidy "Ult aqparat".
Bul týraly Nur-Sultan qalasynyń ákimi Altai Kólginov óziniń Instagram paraqshasynda jazdy.
«Meditsinalyq jedel járdem stantsiiasy men politsiia departamentine 114 kólik satyp alyndy. Onyń 65-i politseilerge, 14-i jedel járdem qyzmetine berildi.
Al jyl sońyna deiin stantsiianyń medqyzmetkerlerine taǵy 35 avtokólik beriledi. Buǵan deiin 50-den astam reanimobilder alyp bergenbiz. Osylaisha jedel meditsinalyq járdem stantsiiasynyń avtoparki jylǵa jetpei eki jarym ese ulǵaidy. (Ótken jyly jeltoqsanda avtoparkte 64 mashina bolsa, qazir endi 165 boldy)» dep jazady shahar basshysy.
Onyń aitýynsha, Memleket basshysynyń tapsyrmasy boiynsha meditsinalyq jedel járdem, politsiia departamenti, kommýnaldyq qyzmetter, qoǵamdyq kólik jáne basqa avtoparkterdi jańartyp, tolyqtyryp otyrýǵa barynsha kóńil bólinip otyr.
«Máselen, turǵyndar birinshi kezekte jedel járdem qyzmetine habarlasady, olardyń árbir minýty qymbat. Meditsina qyzmetkerleri mine, birneshe aidyń júzi boldy koronavirýspen kúreste aldyńǵy shepte júr. Árbir jannyń ómiri úshin janyn salyp, jumys istep keledi. Jańa reanimobilderde alǵashqy meditsinalyq kómek kórsetýge arnalǵan jasandy tynys alý apparaty, ingaliatsiialyq ottegi júiesiniń jinaǵy; monitor-defibrilliator; elektrosorǵyshtar; arteriialyq qysym, qyzý, tynys alý jiiligin ólsheitin fýnktsiiasy bar reanimatsiialyq-anesteziologiialyq monitor syndy barlyq qajetti jabdyq bar. Maýsymdyq aýrýlar men Covid-19 virýsyn juqtyrý qaýpin eskersek, bul avtokólikter bizdiń turǵyndarǵa barynsha sapaly qyzmet kórsetýge múmkindik beredi. Indettiń órshigen tusynda jedel járdem qyzmetine kúnine 3 myńnan astam shaqyrtý túsip otyrdy. Avtopark mashinalarynyń 2,5 ese artqany jedel kómek kórsetýmen qatar meditsina qyzmetkerleriniń de jumysyn aitarlyqtai jeńildetedi. Meditsina mamandaryn rezidentýrada oqytýǵa jarty milliard teńge bólindi, iaǵni bul 300-dei grant» dep atap ótti Altai Kólginov.
Ákimniń sózine sensek, politsiia qyzmetiniń de avtoparki 65 mashinamen tolyqqan. TJ rejimi kezinde politsiia departamenti qyzmetkerleri eki ai boiy blokposta táýlik boiy kezekshilikte boldy, kúndiz de, túnde de tártiptiń saqtalýyn qamtamasyz etip keledi.
«Barlyǵy da turǵyndarymyzdyń qaýipsizdigi úshin jasalyp otyr», – dep jazady qala basshysy.
Ákimdik tarapynan satyp alynǵan avtokólikterdi «Astana Motors» kompaniiasy áleýmettik jaýapkershilikti eskere otyryp, merziminen buryn jetkizip bergen.
