Nur-Sultan qalasynyń ákimi Altai Kólginov Instagram paraqshasynda jastardyń baspana máselesi qandai jolmen sheshilip jatqanyn túsindirip ótti, dep habarlaidy elorda ákimdiginiń resmi saity.
«Qalany damytýdyń jáne ómir súrýge qolaily jaǵdai jasaýdyń negizgi máselelerin talqyladyq. Qysqasha eki baǵytqa toqtalǵym keledi: «Elorda Jastary» jastar baǵdarlamasy jáne erekshe qajettiligi bar adamdar úshin jaǵdai jasaýǵa baǵyttalǵan.
Ótken jyly volonterlermen, jastar uiymdarynyń ókilderimen kezdesýlerde «Elorda Jastary» baǵdarlamasynyń tujyrymdamasyn ázirledik. Onda kórsetilgen negizgi baǵyttar: sapaly jáne qoljetimdi bilim berý, jumysqa ornalasýǵa jáne jastar kásipkerligin damytýǵa kómek kórsetý, kásiptik baǵdarlaý, bos ýaqytty tiimdi ótkizý, salaýatty ómir saltyn nasihattaý jáne t. b.
Memleket basshysynyń tapsyrmasy boiynsha «Elorda Jastary» baǵdarlamasynyń negizgi baǵyty – turǵyn úi máselesi. Osy jyly elordanyń jas mamandaryn jeńildikpen áleýmettik nesielendirýdiń jańa turǵyn úi baǵdarlamasyn iske qosýdy josparlap otyrmyz. Bul baǵdarlamaǵa 36 jasqa deiingi jastar qatysa alady (jubaiynyń/zaiybynyń jasy mańyzdy emes). Elordalyq tirkelim kem degende bir jyl bolýy kerek jáne baǵdarlama úmitkeriniń jeke baspanasy bolmaýy kerek. Resmi jumys ótili 1 jyldan kem emes bolýy shart.
Osylaisha atalǵan turǵyn úi baǵdarlamasyna qatysýshy turǵyn úi satyp alýǵa 13 mln teńgege deiin qaryz ala alady (jyldyq 5% jeńildikpen). Satyp alynatyn turǵyn úidiń quny shekteýsiz.
Sonymen qatar osy jyly Elbasynyń bastamasymen qolǵa alynǵan «Jumys isteitin jastarǵa arnalǵan jalǵa beriletin turǵyn úi» baǵdarlamasy da jalǵasady. Osy baǵdarlama aiasynda jyl sońyna deiin taǵy 1 myńnan astam jastar baspanaly bolady.
Ekinshi baǵyt – múmkindigi shekteýli jandarǵa jaǵdai jasaý. Qalada birqatar áleýmettik jobalar, sonyń ishinde «Kedergisiz keleshek» jobasy júzege asyrylýda. Osy joba jelisi boiynsha 12 beiimdeý sektsiiasy ashyldy, respýblikalyq klinikalarǵa kvotalar bólindi, múgedekter arbalary jáne t. b. syiǵa tartyldy.
Sonymen qatar qalada birqatar áleýmettik nysandar salynýda: ońaltý ortalyqtary, kórý qabileti buzylǵan balalarǵa arnalǵan balabaqsha, paralimpiadalyq jattyǵý ortalyǵymen birlesip, múmkindigi shekteýli adamdarǵa arnalǵan sport keshenin salamyz.
Mysaly, ótken jyly Tuńǵysh Prezident qory men «Samuryq-Qazyna» qoyrynyń qoldaýymen №1 qalalyq balalar aýrýhanasy bazasynda «Qamqorlyq» ońaltý ortalyǵy ashyldy. Sondai-aq BTsP, aýtizm, Daýn sindromy jáne t. b. diagnozy bar balalardy ońaltýmen ainalysatyn birqatar ońaltý ortalyqtary ashyldy», - dep jazdy elorda ákimi.
