Nur-Sultan qalasynda jańadan 4 dene shynyqtyrý jáne saýyqtyrý kesheni salynady. Bul týraly brifing barysynda elordalyq Dene shynyqtyrý jáne sport basqarmasy basshysynyń orynbasary Nariman Elamanov málim etti, dep habarlaidy "Ult aqparat".
«100 dene shynyqtyrý-saýyqtyrý keshenin» salý jobasy aiasynda atalmysh nysandar Ilinka, Kóktal-2, Óndiris, Jeleznodorojnyi turǵyn úi alaptarynda boi kóteredi.
«Qazirgi ýaqytta úsh dene shynyqtyrý jáne saýyqtyrý kesheniniń qurylysy júrip jatyr. Qosymsha, «Jumyspen qamtýdyń jol kartasy» aiasynda «Tolqyn» sport kesheniniń shatyry kúrdeli jóndeýden ótti. Qazir tek qabyrǵalaryn tegisteý, aqtaý, syrlaý siiaqty jumystary qaldy», - dep atap ótti Nariman Elamanov.
Sondai-aq, Nur-Sultan qalasyndaǵy «Qazaqstan» sport saraiyn zamanaýi tehnologiialardy qoldana otyryp jóndeý jobasy pysyqtalýda. Oǵan qosa, «Astana Arena» stadionynyń fýtbol alańyn jańartý jáne kiim aýystyrý bólmelerin, kireberisin jóndeý júrgizilýde.
«Sonymen qatar qalada IAAF (Halyqaralyq jeńil atletika federatsiialarynyń qaýymdastyǵy) talaptaryna tolyq sáikes keletin jabyq ǵimarattarda halyqaralyq jáne respýblikalyq jarystardy ótkizýge arnalǵan jeńil atletikalyq sport kesheniniń qurylysy aiaqtalýda. Nysan álem chempionattary men jazǵy Olimpiada oiyndaryn qosa alǵanda, sportshylardy halyqaralyq jarystarǵa daiarlaý úshin qazirgi zamanǵy joǵary tehnologiialyq baza bolady. «Qazanat» ippodromynyń aýmaǵynda ippoterapiia ádisimen múmkindigi shekteýli balalardy ońaltý úshin at sporty keshenin salý jáne paidalanýǵa berý boiynsha jumystar júrgizilýde. Nysan 250 adamǵa arnalǵan, 600 oryndyq tribýnalary bar. Bul joba memlekettik-jekeshelik áriptestik sheńberinde jeke qarjylyq bastama boiynsha iske asyrylyp jatyr», - dedi N.Elamanov.
Budan bólek, qalalyq Dene shynyqtyrý jáne sport basqarmasy basshysy orynbasarynyń málimetinshe, elordada velojoldar salý jumysy qarqyn alǵan. Josparlanǵan 123 km joldyń 70 km búginde salynyp bitken. 2020 jyly – 46,4 km, 2021 jyly – 36 km, al 2022 jyly – 40,7 km velojol salý josparlanýda.
