Nur-Sultan qalasynda túrik investorlary meditsinalyq buiymdar shyǵaratyn kásiporyn salady, dep habarlaidy "Ult aqparat" «KAZAKH INVEST» UK» AQ-ǵa silteme jasap.
«MFA Mask» kompaniiasynyń túrik investorlary Nur-Sultanda meditsinalyq maskalar óndirisine investitsiia salmaq. QR Premer-Ministriniń orynbasary Eraly Toǵjanovtyń tóraǵalyǵymen ótken keńes barysynda QR Syrtqy ister ministrligi, Nur-Sultan qalasynyń ákimdigi jáne «MFA Mask» arasynda jobany iske asyrý týraly tiisti úshjaqty memorandýmǵa qol qoiyldy. Kásiporyn Nur-Sultanda «Astana – jańa qala» arnaiy ekonomikalyq aimaǵynyń aýmaǵynda ornalasady. Jalpy quny shamamen 9,3 mln dollardy quraityn jobany «KAZAKH INVEST» UK» AQ qoldaýymen iske asyrý josparlanyp otyr», - delingen aqparatta.
Qujatqa sáikes, túrik kásipkerleri jobany 2024 jylǵa deiin eki kezeńde júzege asyrýdy kózdep otyr.
Birinshi kezeńdi 2021 jyldyń qazan aiynda aiaqtaý josparlanýda. Solaisha, jyl saiyn 3,5 millionǵa deiin meditsinalyq buiym shyǵarý kózdelip otyr.
Ekinshi kezeńde ónim kólemi 10 mln birlikke deiin arttyrylmaq.
«Kásiporynda FFP2 jáne FFP3 sanattaǵy respiratorlar shyǵarylatyn bolady. Sondai-aq gazqaǵarlar men súzgiler, evakýatsiialaýǵa arnalǵan ózdiginen totyqtyrylatyn maskalar óndirisi jolǵa qoiylady.
Jobany iske asyrý 100-ge jýyq turaqty jumys ornyn qurýǵa múmkindik beredi.
Kásiporynda zamanaýi túrik jáne nemis jabdyqtaryn ornatylady.
Budan basqa, Túrkiiadan joǵary sapaly sertifikattalǵan shikizatty jetkizý jolǵa qoiylady. Óndirilgen ónim Qazaqstan naryǵyna jetkizilip, Resei men Ortalyq Aziia elderine eksporttalady», - dedi «KAZAKH INVEST»-ten.
