Elordada aýlalardyń birinde 5 jasar bala jaraqat alyp, saýsaǵyna ampýtatsiia jasaldy. Syrǵanaq bólshektelip, aýladan shyǵaryldy, dep habarlaidy "Ult aqparat".
«25 sáýir kúni keshke 4 jastaǵy bala aýrýhanaǵa tústi. Anasynyń aitýynsha, bala syrǵanaqtan túsý kezinde saýsaǵyn qysyp alǵan. Saldarynan sol qolyndaǵy shyldyr shúmek saýsaǵynyń ústińgi jaǵyna ampýtatsiia jasaldy. Travmatologiialyq pýnkt deńgeiinde jarany alǵashqy hirýrgiialyq óńdeý júrgizildi, tuqyl jasalyp, gips salyndy. Bala ambýlatoriialyq emdelýge jiberildi», - dep jaýap berdi elordalyq Densaýlyq saqtaý basqarmasy agenttik saýalyna.
Atalǵan oqiǵa elordanyń Baiqońyr aýdanyndaǵy Kenshiler kóshesi, 2 úi meken-jaiynda bolǵan jáne aýdan ákimdigi zardap shekken balanyń otbasyna kómek kórsetken.
«Búgingi tańda «Baiqońyr» aýdanynyń ákimdigi balanyń otbasyna barlyq qajetti meditsinalyq jáne materialdyq kómek kórsetedi. Sondai-aq, oqiǵa ornyndaǵy syrǵanaq bólshektelip, aýmaqtan shyǵaryldy. Qazir kúnniń jylýyna bailanysty balalardyń barlyǵy aýlaǵa shyǵady. Sol sebepti ata-analarǵa men balalardy qyraǵy bolýǵa, balalarǵa qaýipsizdik erejeleri týraly aitýǵa shaqyramyz», - dep habarlady Baiqońyr ákimdiginiń baspasóz qyzmeti.
