25 jeltoqsannan bastap elordada saýda alańy 2 myń sharshy metrden asatyn gipermarketter men sýpermarketterge táýlik boiy jumys isteýge ruqsat etildi, dep habarlaidy "Ult aqparat".
Qala ákimdiginiń málimetinshe, elorda basshysy Altai Kólginov úlken kezekterdiń paida bolýyna jol bermeý úshin jańajyldyq merekeler qarsańynda obektilerdi táýlik boiǵy jumys rejimine aýystyrýǵa ruqsat berýdi tapsyrdy.
«Mereke qarsańynda dúkenderde kelýshilerdiń sany kóbeiýi baiqalady. Úlken kezekterdiń paida bolýyna jol bermeý úshin jarlyqta jańa jumys kestesi belgilendi. Aýmaǵy 2 myń sharshy metrden asatyn sýpermarketter men gipermarketter jumys ýaqytynda shektelmeidi. Kelýshiler sany 30% aspaýy kerek. Jer-jerlerde obektilerdiń basshylary sanitarlyq-epidemiologiialyq normalardy qatań saqtai otyryp jumysty uiymdastyrýy kerek», - dedi qalanyń sanitarlyq dárigeri Janna Pirálieva.
