Elordada aýyl sharýashylyǵy jármeńkeleri jalǵasýda, dep habarlaidy "Ult aqparat".
Qalalyq ákimdiktiń málimetine sensek, «Aspan bazary» saýda úiinde (Qoshqarbaev, 37) ár demalys saiyn aýyl sharýashylyǵ jármeńkesi ótkiziledi.
Onda sharýa qojalyqtary men aýylsharýashylyq taýar óndirýshileriniń azyq-túlik ónimderi usynylǵan.
«Aspan» basshylyǵy jármeńkege qatysýshylarǵa aqysyz oryn usynady», - deidi «Aspan» bazarynyń atqarýshy direktory Aitýǵan Qulmahambetuly.
Taýarlardy satatyn kásipkerler barlyq jaǵynan qolaily jaǵdai jasalǵanyn atap ótti. Sórelerde kókónister men jemister naryq baǵasynan tómen satylýda.
«Biz bul múmkindikke rizamyz. Qiiar men qyzanaq qymbat emes. Mysaly, qiiar baǵasy 350-400 teńge, basqa bazarlarmen salystyrǵanda tiimdi», - deidi kásipker Lira Iliiasova.
Siz sondai-aq sút ónimderi men joǵary sortty etti arzan baǵamen satyp ala alasyz. Aqmola oblysynyń sharýa qojalyqtary men «Bakara» JShS siyr etiniń kelisin 1750 teńgeden usynady.
«Iri qara eti 1750 teńgeden satylýda. Jylqy etiniń baǵasy 1900 teńgeden. Buǵan deiin siyr eti 2000-2200, jylqy eti 2400 teńgeden satylatyn. Jármeńkede biz baǵany tómendetemiz», - deidi kásipker Raihan Shadanova.
Jármeńkeniń turaqty kelýshileri - jaqyn mańdaǵy turǵyndar.
«Biz jaqyn mańda turamyz. Baǵasy arzan bolǵan soń osynda kelemiz. Bul jerde qyryqqabat pen piiazdyń baǵasy 80 teńge. Baǵalar jaqsy», - deidi elorda turǵyny Venera Izeeva.
Aqmola jáne Qaraǵandy oblystarynyń fermerleri azyq-túlik ónimderin ákeledi.
«Biz osy aýdanda turamyz. Jármeńke týraly estip, baǵalardy basqa oryndarmen salystyrdyq. Óte tiimdi jáne qol jetimdi. Búgin un men mai alýǵa keldim. Munda bári kóterme baǵamen jáne óte arzan», - deidi Baýyrjan Daniiaruly.
Jármeńke apta saiyn senbi men jeksenbide ótkiziledi. Uiymdastyrýshylar kelýshiler sanitarlyq normalardy qatań saqtaý keregin eskertedi.
