Elordada «Múmkindigi shekteýli jandarǵa arnalǵan prototipter men gadjetterdi oilap tabý» atty meikaton marafony ótedi, dep habarlaidy QazAqparat.
Uiymdastyrýshylardyń málimetinshe, 13-16 qarasha kúnderi ótetin sharada jas ónertapqyshtar erekshe kútimdi talap etetin jandardyń ómirin jeńildetýge arnalǵan tehnologiialyq týyndylaryn tanystyrady. Sonyń ishinen úzdik degeni tańdalyp, ideia júzege asyrylatyn bolady.
«Meikaton jobasy tek múmkindigi shekteýli jandarǵa kómektesip qoimai, óz ideialaryn júzege asyramyn deýshiler úshin taptyrmas alań. Qalalyq ákimdiktiń qoldaýymen ótken atalǵan sharaǵa 7 komanda qatyssa, biyl onyń sany 10-ǵa jetip otyr. Taǵy bir aita ketetin sát, ótken jylǵy 7 jobanyń 2-i naqty qoldaý taýyp, júzege asyryldy. Bul adam ómirin jeńildetý men jetildirý jolyndaǵy taptyrmas joba deýge bolady. Osy shara arqyly jastar óz ideialaryn júzege asyrýǵa múmkindik alýmen qatar, ózara tájiribe almasady. Sondyqtan da bizdiń ortalyq osy sekildi paidaly jobalardy qoldaýǵa árqashanda daiyn», - dedi Nur-Sultan qalasy ákimdigi «Astana jastary» resýrstyq ortalyǵy basshysynyń orynbasary Aian Ermentaev sharanyń uiymdastyrylýyna orai ótken onlain baspasóz máslihatynda.
Aita ketsek, Meikaton (Makeathon) TOM 72 saǵattyq tyń jobalar men ideialar marafony.
