Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova koronavirýs infektsiiasy boiynsha statistikany jariialady, dep habarlaidy QazAqparat.
«Jalpy elordada koronavirýs infektsiiasyn juqtyrǵan 631 adam anyqtaldy. Onyń 36 paiyzy jazylyp, 14 kúndik úi karantinine shyǵaryldy. Juqtyrǵandardyń ishinde er adamdardyń úlesi 55, áielderdiń úlesi 45 paiyz. KVI juqtyrǵandardyń ishinde 18-29 jas jáne 30-49 jas aralyǵyndaǵy adamdardyń úlesi 36 paiyzdy qurady. 50-59 jas aralyǵynda azamattardyń úlesi – 14 paiyz. 60-69 jas aralyǵylar – 6,5 paiyz, balalardyń úlesi 4,2 paiyz», - Sáýle Qisyqova dedi Densaýlyq saqtaý ministrliginiń Facebook-tegi paraqshasynda bergen suhbatynda.
Basqarma basshysynyń aitýynsha koronavirýs juqtyrǵandardyń 3,7 paiyzyn 70 jáne odan da kári jastaǵylar quraidy.
«Sońǵy táýlikte elordada 16 jaǵdai tirkeldi. Onyń ishinde 8 jaǵdai naýqaspen jaqyn qarym-qatynasta bolǵan adamdar. Olar osyǵan deiin úi karantininde bolǵan azamattar. Eki jaǵdaida virýsqa kúdikti adamdardyń monitoringi barysynda belgili boldy. Eki jaǵdai observatsiialyq emhanada JRVI belgisimen túsken azamattardyń ishinen anyqtalyp otyr», - dedi ol.
Elordada búgingi kúni 2724 adam úi karantininde ornalastyrylǵan.
«Aýrýhanada búgingi kúni 1065 naýqas em alýda. Onyń ishinde koronavirýs infektsiiasy anyqtalǵan azamattardyń sany 395. Onyń ishinde 12 naýqastyń jaǵdaiy turaqty aýyr dep sanaimyz. Tórt naýqas respýblikalyq intensivti terapiia ortalyǵynda em alyp jatyr. Tórt naýqas ókpeni jasandy jeldetý apparatyna qosylǵan», - dedi ol.
