L.N. Gýmilev atyndaǵy EUÝ mańyndaǵy úsh myń sharshy metrge jýyq jańa kópir alańy abattandyryldy. Bul týraly Nur-Sultan qalasy ákimi Altai Kólginov óz «Instagram» paraqshasynda jazdy, dep habarlaidy ákimdiktiń resmi saity.
«Turǵyndarymyz ben elorda qonaqtary úshin taǵy bir kópirasty keńistik (L.N.Gýmilev atyndaǵy EUÝ mańy) ashyldy. Ol úshin 3 myńǵa jýyq sharshy metr jer abattandyryldy. Jańa qoǵamdyq keńistik eki bólek ornalasqan úlken aýmaqtan turady. Bul – basketbol jáne vorkaýt alańdary. Jas turǵyndarymyzdyń ótinishi boiynsha skeit-alań ashylyp, tennis ústeli ornatyldy.
Sýretshilerimiz de qabyrǵalarǵa tanymal sportshylardy beinelep, ol da ózindik sán berip tur. Bul – balalardyń kóz aldynda olarǵa rýh berip, ózderine senimdi bolýy úshin úlgi bolarlyqtar kórinis. Óitkeni kásibi arenalarǵa aparatyn jol jáne salaýatty ómir saltyn qalyptastyrý aýladaǵy sporttan bastalatyny belgili. Ol úshin biyl 150 aýla men 50 qoǵamdyq keńistikti abattandyramyz. Osynyń ózi bizge 300 myńnan asa adamnyń sportpen ainalysýyna jaily jaǵdai jasaýǵa múmkindik beredi. Budan bólek, 3 turǵyn alapta úlken sport kesheniniń qurylysy júrip jatyr. Sol siiaqty birqatar sport nysanyna jóndeý júrgiziledi.
Karantin bizge densaýlyqqa asa mán berip, immýnitetimizdi kóterip, sportpen ainalysý kerektigin kórsetti», - dep jazdy Altai Kólginov.
