Elordada karantin rejimi jeńildemeidi, turǵyndar sanitarlyq normalardy qatań saqtaýy tiis. Qalanyń perimetri boiynsha blok beketter jumysyn jalǵastyrýda, dep habarlaidy "Ult aqparat" qala ákimdiginiń resmi saityna silteme jasap.
Qalany patrýldeý, kásiporyndardyń sanitarlyq normalardy saqtaýy, halyq arasynda túsindirme júrgizýge politseilerdiń barlyq quramy jumyldyryldy. Dárigerler men volonterler jáne t.b. kúsheitilgen rejimde jumys isteýde.
Búgin elorda ákimi Altai Kólginov koronavirýs infektsiiasynyń taralýyna qarsy kúres boiynsha jiyn ótkizdi. «Karantin rejimi jeńildegennen keiin qazir kóshelerde adam kóp. Kún saiyn júrgizilip jatqan reid qatań sanitarlyq normalardy saqtaý qajetin kórsetip otyr: sanitarlyq-epidemiologiialyq talaptardy buzǵany úshin 26 nysan jabyldy, olar qurylys kompaniialary, dámhanalar men meiramhanalar, qonaqúiler jáne t.b.150-den astam kásiporyn eskertý alyp, keibirine aiyppul salyndy. Reid kezinde saiabaqtar men gúlzarlarda adamdar toptanyp, maskasyz júretini anyqtaldy. Osynyń bári infektsiianyń tez taralýyna ákelýi múmkin. Dárigerlerge virýsty der kezinde anyqtap, indet oshaǵyn joiý qiyn bolady. Osyǵan orai politseiler kúsheitilgen rejimde jumys istep, halyqqa túsindirmeni kúsheitip, qyzmeti ruqsat etilgen kompaniialar jumysyna kúndetikti monitoring júrgizýi tiis. Sanitarlyq normalardy buzǵan nysandar jabylady. Virýs juqtyrý qaýpi áli bar, sondyqtan bosańsýǵa bolmaidy», - dedi Altai Kólginov.
Qala ákimi árkim óziniń jáne jaqyndarynyń densaýlyǵy úshin áleýmettik jaýapkershilik tanytý keregin aitty. Ókinishke qarai, aýyrǵandardyń 40%-y 18 ben 30 jas arasyndaǵy jastar, 36%-y 30 dan 50-ge deiigi adamdar. Koronavirýsqa ádettegi tumaý dep qaramaý kerek. Bul aýrý sanaýly kúnniń ishinde myqty ári buryn sozylmaly aýrýlary bolmaǵan adamnyń densaýlyǵyn qurta alady. Tek ózin-ózi oqshaýlaý men sanitarlyq talaptardy udaiy saqtaý ǵana – burynǵy qalypty ómirimizge tez jetkizetin jáne eń durys jol».
