Astanada jáne Qazaqstannyń eki óńirinde alǵash ret taýarlyq gazǵa shekti kóterme saýda baǵasy bekitildi. Bul týraly QR Energetika ministri Nurlan Noǵaev halyq aldynda esep berý kezdesýinde aitty, dep habarlaidy QazAqparat.
«Saryarqa» magistraldyq gaz qubyry qurylysynyń arqasynda Nur-Sultan qalasy, Aqmola jáne Qaraǵandy oblystarynyń turǵyndary kógildir otyndy paidalanýǵa múmkindik aldy. Qyzylorda oblysynan bastalatyn «Saryarqa» gaz qubyry elimizdiń astanasyn, ortalyq jáne soltústik óńirlerdi kógildir otynmen qamtamasyz etýge múmkindik beredi», - deidi QR Energetika ministri Nurlan Noǵaev.
Onyń aitýynsha, Nur-Sultan qalasynyń, Aqmola jáne Qaraǵandy oblystarynyń tutynýshylary úshin QR Energetika ministrligi shekti kóterme baǵany 1000 tekshe metr úshin QQS-syz 24 537 teńge mólsherinde bekitti.
«Taýarlyq gazǵa shekti kóterme baǵany QR Energetika ministrligi QR Ulttyq ekonomika ministrligimen kelisý arqyly ulttyq operatordyń taýarlyq gazdy satyp alýǵa jáne taýarlyq gazdy tasymaldaýǵa ketken shyǵyndaryn, óńirlerdi gazben qamtýdyń ekonomikalyq jáne áleýmettik jaǵdailaryn eskere otyryp, bekitedi. Qazirgi ýaqytta magistraldyq gaz qubyryna qosý úshin jergilikti atqarýshy organdar, iaǵni Nur-Sultan qalasy, Qaraǵandy jáne Aqmola oblystarynyń ákimdikteri gazdy odan ári halyqqa berý úshin gaz taratý jelileriniń qurylysy boiynsha jumystar júrgizýde», - dep atap ótti Nurlan Noǵaev.
