9 sáýirden beri elordada 5 myńǵa jýyq adamǵa ekspress-testileý júrgizildi. Bul týraly elordanyń Qoǵamdyq densaýlyq saqtaý basqarmasynyń basshysy Sáýle Qisyqova aityp berdi, dep habarlaidy QazAqparat.
«9-13 sáýir aralyǵynda Nur-Sultan qalasynda 4 766 adamǵa koronavirýs infektsiiasyna bailanysty ekspress testileý júrgizildi. Onyń 61 jaǵdaiynda nemese 1,2% testileý oń nátije kórsetti», - dep atap ótti basqarma basshysy «Habar 24» telearnasyndaǵy brifingte.
Bas memlekettik sanitarlyq dárigerdiń qaýlysyna sáikes, bul adamdar ári qaraiǵy tekserý jumystary úshin provizorlyq statsionarǵa jatqyzyldy.
«Iaǵni, polimerazdy-tizbekti reaktsiia ádisimen koronavirýs infektsiiasyna tekserý júrgiziledi. 61 adamnyń 30-y teris nátijemen aýrýhanadan shyǵaryldy», - dedi S. Qisyqova.
Buǵan deiin basqarma basshysy Nur-Sultanda koronavirýs infektsiiasynan qaitys bolǵan adam týraly aityp bergen edi.
Qazirgi ýaqytta elordada juqtyrǵandar sany 264 adamǵa jetti. Sońǵy eki kúnde - 12-13 sáýir kúnderi 29 jaǵdai tirkeldi.
