«Astana – adaldyq alańy» jobasy aiasynda qalalyq máslihat depýtattary Miras Shekenov pen Aqylbek Kúrishbaev jáne taýarlar men kórsetilgen qyzmetterdiń sapasy men qaýipsizdigin baqylaý departamentiniń ókilderi qalalyq birneshe dárihanalarda dári-dármek baǵasyna kezekti monitoring júrgizdi, dep habarlaidy elorda ákimdiginiń resmi saity.
Sait taratqan málimetterge qaraǵanda, búginde qalanyń 80-nen astam dárihanasyna monitoring júrgizildi. Olardyń keibiri dárilik preparattarǵa sáikes sertifikattaryn usynbady.
«Qabanbai batyr dańǵyly, 40 mekenjaiy boiynsha ornalasqan «Órken» dárihanasynan Qazaqstan aýmaǵynda tirkelmegen 500 mg № 3 «Azitromitsin OZON» preparatyn satý deregi anyqtaldy. Bul zańbuzýshylyq tiisti sharalar qabyldaý úshin taýarlar men kórsetilgen qyzmetterdiń sapasy men qaýipsizdigin baqylaý departamentine jiberildi», – dedi depýtat Miras Shekenov.
Depýtat Aqylbek Kúrishbaevtyń aitýynsha, dárihanalardaǵy baǵa Densaýlyq saqtaý ministrligi belgilegen baǵadan aspaidy. Alaida onyń pikirinshe, ainalymǵa engiziletin barlyq dárilik zattardyń qaýipsizdigi men sapasyn qamtamasyz etý qajet.
«Muny Ulttyq dárilik zattardy saraptaý ortalyǵy tekseredi. Ortalyq olarǵa ónimge sáikes sertifikat beredi. Taýarlar men kórsetilgen qyzmetterdiń sapasy men qaýipsizdigin baqylaý departamentinde túsindirgenimizdei, dárihanalarda júkpen birge dárilik zattyń sapasyn kýálandyratyn qujattyń kóshirmesi qosa berilýi tiis. Ókinishke qarai, biz teksergen dárihanalarda bul qujattar bolǵan joq. Barlyǵy firmada, distribiýterlerde degen syltaý aitady. Men bulai ekenine sengim keledi. Dári-dármekterdi qoldan jasaý jáne kontrafaktilik – búkil álemdegi ózekti másele. Dárilerdiń sapasy – eldiń ulttyq qaýipsizdigi, azamattarymyzdyń ómiri men densaýlyǵynyń máselesi. Sondyqtan mundai quqyq buzýshylarǵa qatań zańdar qabyldap, damyǵan elderdegidei dárilik zattardyń ainalymy boiynsha baqylaý engizý qajet», – dedi A.Kúrishbaev.
Osyǵan deiin habarlanǵandai, Nur-Sultanda dári-dármektiń baǵasyn negizsiz kóterý derekterin anyqtaý boiynsha monitoring kúsheitildi. Dárilik zattardyń baǵasy kóterilgen jaǵdaida azamattar IKOMEK 109 biryńǵai bailanys ortalyǵyna, sondai-aq +7 775 160 55 32 WhatsApp nómirine júgine alady.
Úkimet pen Nur-Sultan ákimdigi logistika, dári-dármekterdi satyp alý jáne jetkizý rásimderin jeńildetý máseleleri boiynsha qoldaý kórsetýde. Sonymen qatar, qalalyq prokýratýra, politsiia departamenti, Sybailas jemqorlyqqa qarsy kúres qyzmeti, Memlekettik kirister, Ekonomikalyq tergeý, farmatsevtikalyq baqylaý qyzmetkerlerinen turatyn mobildi top kún saiyn dárilik zattardy alypsatarlarmen kúres jumystaryn júrgizýde.
