Nur-Sultanda «eles» páterlerdi jalǵa berý kúdigimen 25 jastaǵy qyz ustaldy, dep habarlaidy «Ult aqparat».
«Ustalǵan 25 jastaǵy qyz paidakúndemdik maqsatta jeke jarnamalar saityna páterdiń jalǵa beriletindigi týraly feik aqparat ornalastyrǵan. Ol jarnama tartymdy bolýy úshin ózge habarlandyrýlardaǵy páterlerdiń sýretin aldyn ala kóshirip alǵan. Buǵan qosa, ol jaldaý qunyn tómen kórsetken. Kelissózdi telefon arqyly júrgizip, páterdi jalǵa alýshynyń shyn nietine kóz jetkizgen soń elektrondy ámiianǵa aldyn ala tólem aýdarýdy usynǵan. Zardap shegýshi aqsha aýdarǵannan keiin alaiaq habarlandyrýdy óshirip, telefonyn ajyratyp qoiǵan», - delingen Nur-Sultan qalalyq Politsiia departamenti taratqan aqparatta.
Vedomstvo málimetinshe, ustalǵan qyzǵa qatysty QR Qylmystyq kodeksiniń 190-babymen sotqa deiingi tergeý júrgizilip jatyr. Qazirgi ýaqytta 13 zardap shegýshi belgili bolyp otyr. Biraq, olardyń sany munan da kóp bolýy múmkin. Jalpy keltirilgen zalal 500 myń teńgeni quraidy.
«Onlain qyzmet pen saýda-sattyqtyń damýyna orai internet-alaiaqtyq sany da arta túsýde. Tek osy jyldyń qańtar aiynda ǵana kiberalaiaqtyq boiynsha 290 shaǵym tústi. Nur-Sultan qalalyq Politsiia departamenti shyn habarlandyrýdy jalǵan jarnamadan ajyratý úshin usynylǵan qyzmetter men taýarlardyń shyn ekendigin tekserip alýdy usynady. Aldyn ala tólem jibermeý qajet jáne qyzmet tólemin onyń shynaiy ekendigine kóz jetkizgen soń ǵana jasaǵan durys», - dedi politsiiadan.
