Búgin, iaǵni 28 naýryz kúni ótken Senat otyrysynda depýtat Georgii Kim Qazaqstan Respýblikasynyń Premer-Ministri A.U.Maminniń atyna depýtattyq saýal joldady.
Qurmetti Asqar Uzaqbaiuly!
Sizdiń atyńyzǵa depýtattyq saýal joldaýymnyń sebebi, 2019 jylǵy 26 naýryzda saǵat 09.15-te, Nur-Sultan qalasyndaǵy Uly Dala dańǵyly men Qabanbai batyr kóshesiniń qiylysynda iri jol-kólik oqiǵasy boldy.
Resmi derekterge sáikes, bul apattan 35 adam zardap shekti, 2 adam qaza boldy, 23 adam aýrýhanaǵa jatqyzyldy jáne 17 adam ártúrli deńgeide jaraqat alǵan.
Qoldanystaǵy zańnamaǵa sáikes, jolaýshylar qozǵalysynyń qaýipsizdigi úshin kólik quraldaryn tehnikalyq baiqaýdan ótip, júrgizýshi meditsinalyq turǵyda tekseriledi.
Qazaqstan Respýblikasy Indýstriia jáne infraqurylymdyq damý ministrliginiń buiryǵyna sáikes, operatorlardyń tizilimine engizilgen zańdy tulǵalar nemese jeke kásipkerler kólikti tehnikalyq baiqaýdan ótkizýge jaýap beredi.
Qazaqstan Respýblikasy Densaýlyq saqtaý ministrliginiń buiryǵyna sáikes, dárigerlik tekserýlerge zańdy tulǵalar nemese jeke kásipkerler retinde jaldanǵan meditsina qyzmetkerleri jaýapty bolady.
Jolaýshylar tasymaly kóptegen adamdarǵa qatysty bolatynyn jáne qaýipsizdikti talap etetinin eskere otyryp, tehnikalyq jáne meditsinalyq tekserýdi júzege asyratyn zańdy tulǵalar men jeke kásipkerlerdiń qyzmetine baqylaýdy jáne jaýapkershilikti kúsheitý máselesin qaraý qajet dep esepteimin.
«Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasy Konstitýtsiialyq zańynyń 27-babyna sáikes, depýtattyq saýaldyń qaralý nátijelerin zańda belgilengen merzim ishinde jazbasha jaýap berýdi ótinemin.
Depýtat G.Kim
