Nur-Sultan qalasynyń Investitsiialar jáne kásipkerlikti damytý basqarmasy qala dúkenderi men bazarlarynda qant baǵasynyń túrli baǵamen satylyp jatqanyna bailanysty túsinikteme berdi, dep habarlaidy QazAqparat.
QazAqparattyń áleýmettik jelidegi paraqshalaryna astanalyq internet qoldanýshylardan qant baǵasy 510 teńgege deiin kúrt qymbattaǵany týraly málimetter kelip túsken bolatyn. Bul derekterdi Investitsiialar jáne kásipkerlikti damytý basqarmasyna joldaǵanymyzda mynadai jaýap aldyq.
«Nur-Sultan qalasynyń ákimdigi «Saýda qyzmetin retteý týraly» Qazaqstan Respýblikasynyń 2004 jylǵy 12 sáýirdegi N544 Zańyna sáikes, tek áleýmettik mańyzy bar azyq-túlik taýarlarynyń baǵalaryn retteý boiynsha sharalar qabyldaidy.
Qanttyń baǵasyn turaqtandyrý úshin ainalym tetigi aiasynda qaryzdar berilgen. Mysaly, Magným jelilerinde mamyr aiyna deiin qanttyń bir kelisi 319 teńge bolady, al «Astyqjan», «Vkýsmart», «Aian», «Shapaǵat», «Anvar», «Fermag» dúkenderinde qazan aiyna deiin 320 teńge turatyn bolady. Ainalym tetigi boiynsha qaryz alyp, baǵany turaqtandyryp otyrǵan kásipkerlerdiń saýda núktelerinde qant baǵasy kóterilmeidi. Jasasqan shartta osy baǵalar kórsetilgen. Sondyqtan turaqtandyrý qory baǵasyn ustap turǵan taýarlardyń qunyna syrtqy faktorlar áser etpeidi», - dep jazylǵan túsindirmede.
Turaqtandyrý qory astana boiynsha qandai taýarlarǵa, qai núktelerde baǵany ustap turǵanyn bilý úshin myna silteme arqyly tizimmen tanysýǵa bolady.
«Eger sizde baǵanyń kóterilýine qatysty aqparat bolsa, saýda nysanyn, onyń mekenjaiyn, taýar markasyn men baǵasyn kórsete otyryp, Nur-Sultan qalasynyń ákimdigine jazbasha ótinishpen, sondai-aq myna bailanys telefondary arqyly habarlasýyńyzdy suraimyz: 55-68- 99, 55-69-78. Sizdiń ótinishińizdiń negizinde tekseris júrgiziletin bolady. Sonymen qatar, Nur-Sultan qalasynyń monopoliiaǵa qarsy departamentiniń aimaqtyq bólimshesine habarlasa alasyz», - dep jazady ákimdik mamandary.
Degenmen, turǵyndardyń bizge joldaǵan shaǵymy negizinde «Ásem» bazaryndaǵy saýda núkteleriniń biriniń iesine aiyppul taǵaiyndalǵany málim boldy. Bul týraly bazar direktory Nurlan Nurmaǵambetov QazAqparat tilshisine aitty.
«Ol shaǵymdar boiynsha saýda núkteleriniń ielerimen jumys júrgizdik. Bir núkteniń iesi qantty jetkizýshiden 420 teńgeden alyp, 500 teńgeden satqan. Oǵan shara qoldandyq. Ózderi de eldiń qantqa suranysy artqandyqtan alypsatarlardan qymbatqa alǵanyn aityp aqtaldy. Sonda da aiyppul saldyq. Bazardaǵy ishki ereje boiynsha ondai aiyppuldyń baǵasy – 3 myń teńge.
Qazir ózim bazarda júrmin. Qant satylyp jatqan joq. Sebebi qant joq. Búgin basqa taýarlar boiynsha da saýda núktelerin aralap, qarap shyqtym. Áleýmettik mańyzy bar taýar sanalatyn 19 atalym boiynsha 15 paiyzdan artyq ústeme baǵa qosqan derekter kezdespedi. Baǵa kóterý talabyn 3 retten artyq buzǵandarmen kelisimshartty územiz. Sondyqtan kez kelgen shaǵymdy tekserýge daiynbyz», - deidi bazardyń direktory.
