Nur-Sultanda Táýelsizdiktiń 30 jyldyǵyna jasalǵan metall banner áiel men qyzdyń ústine qulady, dep habarlaidy Sputnik Qazaqstan.
Resmi málimetke sáikes, oqiǵa 26 mamyr kúni "Qazaq eli" monýmenti men Piramidanyń arasynda bolǵan. Keshki ýaqytta shań aralas daýyl kóterilip, metall konstrýktsiiasyn ushyryp áketken. Banner eki adamdy basyp qaldy.
Qoǵamdyq densaýlyq saqtaý basqarmasynyń málimetine sáikes, jedel járdem oqiǵa ornyna úsh minýttyń ishinde barǵan.
"Bir áiel jáne kámelet jasqa tolmaǵan qyz zardap shekti. Olardy san alýan dene jaraqatymen qalalyq statsionarlarǵa jetkizgen. Ekeýi de tolyǵymen tekseristen ótti. Qabyldaý bóliminde barlyq qajetti meditsinalyq kómek kórsetildi", - deidi basqarma mamandary.
Jaraqat alǵan áieldi aýrýhanaǵa jatqyzdy. Qazirgi kezde ol qajetti em-dom alyp jatyr, jaǵdaiy turaqty. Al jasóspirim úige jiberildi.
Nur-Sultan qalalyq politsiia departamenti tergeý sharalarynyń bastalǵanyn habarlady. Sol kúni aýdandyq politsiia bólimine habarlasqan adam oqiǵanyń mán-jaiyn aityp bergen. Banner Beibitshilik jáne kelisim saraiynyń aldynda turǵan. Qatty jeldiń áserinen metall konstrýktsiia ońǵa qarai jyljyp, 34 jastaǵy áiel men 12 jastaǵy qyzdyń ústine qulaǵan.
Qazirgi kezde osy oqiǵa boiynsha Qylmystyq kodekstiń 306-baby ("Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmet kórsetý") boiynsha sotqa deiingi tergeý sharalary bastaldy.
Aita keteri, osy bapta 160 ailyq eseptik kórsetkishke (490 080 teńgege) deiingi mólsherde aiyppul salý ne sol mólsherde túzeý jumystaryna tartý kózdelgen. 160 saǵatqa deiingi qoǵamdyq jumystar, ia bolmasa, 40 táýlikke deiingi merzimge qamaqqa alýǵa jazasy da qarastyrylǵan. Kináli adamdy belgili bir laýazymdy atqarý nemese belgili bir qyzmetpen ainalysý quqyǵynan úsh jylǵa deiingi merzimge aiyrýy múmkin.
