Áiel balasymen 12 qabatty turǵyn úidiń balkonynan sekirmek bolǵan, dep habarlaidy QazAqparat Nur-Sultan qalasy Politsiia departamentiniń baspasóz qyzmetine silteme jasap.
«22 qazan kúni saǵat 17:30-da Kýbrin kóshesiniń boiynda politsiia kapitany Qairat Narimanov kóp qabatty úidiń balkonynan aiaǵyn salbyratyp turǵan áieldi baiqaǵan. Onyń qolynda balasy bolǵan. Ol sekirý nietimen balkonnyń qanatynda otyrǵan.
Ony baiqaǵan politsei dereý kireberiske qarai júgirip, joǵary kóterilgen. Esiktiń sańylaýynan áieldiń ony baiqamai turǵanyn paidalanyp, politsiia qyzmetkeri áieldi ustap qalady», - dep málimdedi Politsiia departamentiniń baspasóz qyzmetinen.
21 jastaǵy jas áiel mundai qadamǵa otbasylyq janjaldan keiin barmaq bolǵan. Onyń qolynda bir jarym jasar balasy bolǵan.
«Ol kúni men bir táýliktik kezekshilikten keiin demalysta edim. Balalarymmen balabaqshadan qaityp kele jatyp, úreilenip turǵan azamattar men balkonnyń qanatynda otyrǵan áieldi baiqadym. Oilanbastan kireberiske qarai júgirdim, osy kezde menimen bir kýáger liftige birge kirdi. Qýanyshqa orai, áieldi aman alyp qaldyq», - dedi politsei.
Jas anany osyndai jaǵdaiǵa jetkizgen jubaiyna qatysty qorǵaý nusqamasy shyǵyp, otbasy qatań baqylaýǵa alyndy. Áielmen profilaktikalyq áńgime júrgizilip, psihologiialyq kómek kórsetildi.
