Sáýir aiynda elordada Ashyq jobasy arqyly úi karantinin buzǵan 189 adam anyqtaldy. Bul týraly Nur-Sultan qalasynyń bas memlekettik sanitarlyq dárigeri Sarhat Beisenova aityp berdi, dep habarlaidy QazAqparat.
«Koronavirýs infektsiiasyn tirkeýdiń jalǵasýynyń negizgi sebepteri – turǵyndardyń karantin sharalaryn saqtamaýy, atap aitqanda adamdar kóp jinalatyn oryndarǵa barý, maska taqpaý jáne negizgi sebepterdiń biri ambýlatoriialyq naýqastardyń da, jaqyn bailanysta bolǵan adamdardyń da úi karantini rejimin saqtamaýy bolyp otyr», - dedi S. Beisenova elorda ákimdiginde ótken brifingide.
Onyń aitýynsha, úi karantininde otyrǵan kei adamdar tyiym salynǵanǵa qaramastan talapty buzyp júr.
«Bul olardyń Ashyq jobasyna qatysatyn nysandarǵa barýymen rastalyp otyr. Sáýir aiynda ǵana úi karantinin buzýshylardyń 189-y, onyń ishinde 89 naýqas jáne 100 bailanysta bolǵan adam anyqtaldy», - dedi Sarhat Beisenova.
