Elordada qazaqtyń uly aqyny Abai Qunanbaiulynyń týǵan kúnine orai «Abai mereitoiy» atty kitaptyń tusaýkeser rásimi ótti, dep habarlaidy QazAqparat.
L.N. Gýmilev atyndaǵy Eýraziia ulttyq ýniversiteti aitýly aqynnyń týǵan kúnine orai uiymdastyrylǵan «Adamzattyń bárin súi, baýyrym dep» atty onlain dáris- kontsertiniń aiasynda «Abai mereitoiy» atty kitaptyń tusaýy kesildi.
«Osyndai aitýly data álemdi jailaǵan indettiń saldarynan onlain túrde ótip jatyr, ókinishti. Degenmen rýhymyz myqty. Abai sekildi uly aqynnyń týǵan kúni Qazaqstan ǵana emes, álemdik deńgeide atalyp ótip jatyr. Onyń dáleli búgingi sharany tek qazaqstandyqtar ǵana emes álemniń túkpir-túkpirindegi qandastarymyz tamashalap otyr. Ótken jyly Memleket basshynyń Jarlyǵymen Abai kúni keń aýqymda atalyp ótti. Mereitoi onymen bitken joq, biyl da jalǵasyn tabýda. Biz de óz tarapymyzdan bir kisidei atsalysyp jatqan jaiymyz bar», - dedi «Otandastar» AQ-nyń vitse-prezidenti Maǵaýiia Sarbasov aitýly sharada.
Avtorlardyń málimdeýinshe, kitapqa ABAI TV telearnasynyń ashylýy, ǵylymi konferentsiialar men simpoziýmdar, mereitoilyq monetalar men markalar, shetelderdegi Abai eskertkishteri, saiabaqtar, kósheler men mádeni-aqparattyq ortalyqtardyń ashylýy siiaqty mereitoi jylynda atqarylǵan mańyzdy oqiǵalar engen.
Sondai-aq, atalǵan sharada Abai shyǵarmalarynyń japon, korei, túrik, aǵylshyn, qyrǵyz, portýgal, arab, italian, qytai jáne álemniń basqa da kóptegen tilderine aýdarylyp shyǵatyny aityldy.
