Qasym-Jomart Toqaev "Continental Logistics" JShS-nyń kólik-logistika ortalyǵyna baryp, 6 myń tonnadan astam azyq-túlik taýarlary saqtalǵan qoimany aralap kórdi, dep habarlaidy "Ult aqparat" Aqordaǵa silteme jasap.
Jalpy Nur-Sultan qalasynyń aýmaǵynda kólemi 222 myń sharshy metr bolatyn 7 logistikalyq keshen jáne 37 myń tonna azyq-túlik ónimderin saqtaýǵa arnalǵan 7 kókónis qoimasy bar.
Prezidentke elorda men óńirlerdi azyq-túlikpen qamtamasyz etý máselesi jaiynda baiandaldy. Saýda jáne integratsiia ministri Baqyt Sultanov Memleket basshysyna áleýmettik mańyzy bar azyq-túlik taýarlarynyń baǵasyn retteý maqsatynda qabyldaǵan sharalar týraly málimet berdi. Aýyl sharýashylyǵy ministri Saparhan Omarov Qazaqstan Prezidentine kókónis ónimderin, bidai men un jetkizý jaiyn baiandady. Nur-Sultan qalasynyń ákimi Altai Kólginov Memleket basshysyna elordanyń qazirgi ahýaly jóninde esep berdi.
Qasym-Jomart Toqaev Úkimetke oblystar men qalalardyń ákimderimen birlesip, azyq-túlik taýarlary baǵasynyń qymbattaýyna jol bermeýdi, alyp-satý faktileriniń aldyn alýdy, sondai-aq, turaqtandyrý qoryn tolyqtyrýdy tapsyrdy.
- Bul - óte mańyzdy jumys. Halqymyzdy azyq-túlikpen qamtamasyz etý máselesi - basty mindet. Osy baǵytta durys jumys júrgizý kerek, - dedi Memleket basshysy.
Qasym-Jomart Toqaev qazirgidei Tótenshe jaǵdai kezinde azyq-túlik taýarlaryn turaqty jetkizý baǵytyndaǵy jumystardy júieli júrgizýge erekshe mán beriletinin jetkizdi.
Prezidenttiń aitýynsha, Ortalyq Aziia memleketteriniń úkimetteri járdem suraǵan jaǵdaida, Qazaqstan atalǵan elderge yntymaqtastyqtyń belgisi retinde tiisti kómek kórsetýge ázir.
- Ortalyq Aziiadaǵy kórshiles memleketterge gýmanitarlyq kómek kórsetýge daiynbyz. Qazaqstan - aimaqtaǵy kóshbasshy el. Sondyqtan osyndai qiyn-qystaý kezeńde kómekke zárý elderge qol ushyn sozý mindetimiz, - dedi Qasym-Jomart Toqaev.
