Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qisyqova úi karantininde jatqan turǵyndar týraly aityp berdi, dep habarlaidy QazAqparat.
«Koronavirýs infektsiiasy boiynsha №9 qalalyq emhanada Nur-Sultan qalasynyń meditsinalyq uiymdarynyń 24 qyzmetkerinen mobildi top quryldy. Olar koronavirýs infektsiiasy boiynsha epidemiologiialyq jaǵdaiy qolaisyz dep tanylǵan elderden (1b, 2, 3 sanattar) kelip, úi karantinine jatqyzylǵan turǵyndarǵa kún saiyn habarlasady», - dedi basqarma basshysy qala ákimdiginde ótken onlain brifingide.
2020 jyldyń 20 aqpanynan bastap, 14 408 adam úi karantininde jatty. Olar ár 14 kún saiyn bas memlekettik sanitarlyq dárigerdiń qaýlysyna sáikes, karantinnen shyǵarylyp otyrǵan.
Qazirgi ýaqytta úi karantininde 213 adam jatyr.
Buǵan deiin basqarma basshysy Nur-Sultanda kornavirýs juqtyrǵandardyń basym bóligi 30-49 jas aralyǵynda ekenin málimdegen edi.
Nur-Sultan qalasy boiynsha tirkelgen barlyq 25 jaǵdai boiynsha jaqyn bailanysta bolǵan 244 adam Nur-Sultan men ózge óńirlerdegi aýrýhanalarǵa jatqyzyldy.
Sonymen birge, aldaǵy eki aptada elorda turǵyndaryna koronavirýs infektsiiasyna qatysty ekspress testileý júrgiziledi.
Eske sala ketsek, Qazaqstanda qazir koronavirýs infektsiiasyn juqtyrǵandar sany 49 adamǵa jetti. Almatyda – 22 adam, Qaraǵandy qalasynda - 2 adam, Nur-Sultanda - 25 adam tirkelgen.
