Nur-Sultanda 34 jastaǵy qala turǵyny eki jasar náresteden "Samsýng A-21" uialy telefonyn tartyp aldy. Balanyń anasy politsiiaǵa aryzdandy.
Elorda politsiia departamentiniń málimetinshe, qyzdyń anasy qonaqúide ákimshi bolyp jumys isteidi, dep habarlady Sputnik.
Qylmys jasalǵan kúni áiel jumys ornynda kishkentai balasymen bolǵan. Ol qyzyna smartfonyn berip, ekinshi qabatqa kóterilgen. Oqiǵa beinebaqylaý kamerasynyń obektivine túsip qaldy.
Videoǵa qaraǵanda, qyz baspaldaqpen kóterilip bara jatqanda áieldi kezdestirgen. Ol balanyń qolyndaǵy telefondy kórip, ony alyp ketken.
Politseiler jedel-izdestirý sharalaryn júrgizip, qylmysqa qonaqúidiń burynǵy klientiniń qatysy bar ekenin anyqtady.
"Birneshe saǵat ishinde áiel ustalyp, politsiiaǵa jetkizildi. Ol buryn sottalǵan 34 jastaǵy qala turǵyny bolyp shyqty", - dep habarlady elorda politsiia departamenti.
Kúdikti kinásin moiyndady, urlanǵan telefon iesine qaitaryldy. "Tonaý" baby boiynsha sotqa deiingi tergeý bastaldy.
Qazaqstannyń Qylmystyq kodeksine sáikes, mundai is-áreketke 2 myń AEK-ke deiin (6 million teńgege jýyq) aiyppul salý ne sol mólsherde túzeý jumystaryna, ne 1000 saǵatqa deiin qoǵamdyq jumystarǵa tartý nemese 4 jylǵa deiin bas bostandyǵyn shekteý nemese sol merzimge bas bostandyǵynan aiyrý jazasy qarastyrylǵan.
Nur-Sultan politsiia departamenti azamattardan kishkentai balalardy qaraýsyz qaldyrmaýdy suraidy.
