Nur-Sultan men Almaty qalalarynda aýrý juǵý qaýpi eń az degen kásiporyndar iske qosylady. Bul týraly QR Aqparat jáne qoǵamdyq damý ministri Dáýren Abaev málim etti, dep habarlaidy QazAqparat.
«Ózderińiz bilesizder, Memlekettik komissiia sheshimimen 20 sáýirden bastap Nur-Sultan jáne Almaty qalalaryndaǵy birqatar ekonomika sektorlarynyń jumysy qalpyna keltiriledi. Olardyń naqty tizimi 15 sáýirde belgili bolady. Biraq biz jýrnalister men azamattardan kóp suraq túsip jatqandyqtan, jumysyn jalǵastyrýy múmkin sektorlar týraly jalpy aqparat bergimiz kelip otyr», - dep toqtaldy ministr telearna arqyly ótken onlain brifing barysynda.
Osy oraida ol atalǵan ózgeris Nur-Sultan men Almaty qalalarynda bir ýaqytta engizilgenimen, eki qalada jumys protsesinde aiyrmashylyq bolýy múmkin ekenin jetkizdi.
«Onyń sebebi osy qalalardyń epidemiialyq jaǵdaiynyń jáne ekonomikasynyń aiyrmashylyǵyna bailanysty. Sondyqtan barlyq niýanstardy ákimdikter turǵyndarǵa aldyn ala habarlap, túsindirip otyrady. Ekinshiden, karantin talaptarynyń ózgerisi birden emes, kezeń-kezeńmen júzege asyrylady. Ár kezeńde Densaýlyq saqtaý ministrliginiń qorytyndysy esepke alynady. Qazir tek birinshi kezeń týraly sóz bolýda. Bul kezeńde aýrý juǵý qaýpi eń az degen kásiporyndar iske qosylady. Bundai kisiporyndarda sanitarlyq normalardy saqtaý boiynsha arnaiy hattamalar daiyndalady. Onyń oryndalýy turaqty túrde tekseriledi», - dedi Dáýren Abaev.
Eger kásiporyn ol talaptardy buzsa, qatań shekteý sharalary qoldanylady.
