Jyl saiyn elorda kóshelerin erigen qar men jaýyn-shashynnyń sýy basyp qalady. Endigi ýaqytta atalǵan máseleni sheshýmen jańadan qurylǵan mekeme ainalysatyn bolady, dep habarlaidy "Ult aqparat" Elorda Info saityna silteme jasap.
«Bizdiń basqarma qalany jylý, jaryq jáne sýmen qamtamasyz etý jumystarymen ainalysady. Bizge júktelgen jańa mindet – elordany gazben qamtamasyz etý. Buǵan deiin habarlaǵanymyzdai, kelesi jyldan bastap astanalyqtar gaz paidalana bastaidy. Basqarmanyń aldyna qoiylǵan negizgi tapsyrmalardyń biri – neshe jylǵy problemaǵa ainalǵan kóktem-kúz mezgilinde qala kóshelerin sý basý problemasy. Bul maqsatta osy máselemen ainalysatyn arnaiy mekeme quratyn bolamyz. Aita ketý kerek, Qazaqstannyń basqa qalalarynda ondai mekeme joq. Ol sharýashylyq júrgizý quqyǵyndaǵy memlekettik kásiporyn bolady. Qala boiynsha bir ǵana «Astana-Tazalyq» JShS úlgermeidi jáne olardyń basqa da negizgi mindetteri bar», – dedi qalalyq Otyn-energetikalyq kesheni jáne kommýnaldyq sharýashylyq basqarmasynyń basshysy Ernat Bázil.
