Áleýmettik jelilerde halyqty dúrliktirgen videoǵa qatysty Qaraǵandy oblysynyń ákimdigi túsinik berdi, dep habarlaidy "Ult aqparat".
Áleýmettik jelilerde paidalanýshylar Nur-Sultan – Qaraǵandy qalalary arasyndaǵy trassada qoiylǵan beton bógetterge qatysty videony qyzý talqylaýda. Halyq bul bloktar Qaraǵandy oblysynda qaitadan qatań karantindik shekteýler bolatynyn aityp, boljam jasaýda. Alaida, oblys ákimdiginiń baspasóz qyzmeti bul qaýesetti joqqa shyǵardy.
«19 qazannan bastap óńir boiynsha sanitarlyq beketter jumys istei bastady. Olardyń jalpy sany - segiz. Atalmysh beketterde dárigerler men politsiia qyzmetkerleri jumys isteidi. Tekserý barysynda saýalnama júrgizilip, termometriia júzege asyrylady. Bul - blokpostar emes», - dep túsindirdi Qaraǵandy oblysynyń ákimdiginde.
Eske salsaq, sanitarlyq beketter Jezqazǵan, Priozersk, Ulytaý, Nura, Buqar Jyraý, Qarqaraly, Osakarov aýdandarynda ornatyldy.
Qazirgi ýaqytta oblystyń karantinge jabylýy týraly aqparat joq. Eger júrgizýshi men jolaýshylardyń deni saý bolsa, sanitarlyq beketter jol júrýge kedergi etpeidi.
