Nur-Sultan qalasynda jyl basynan beri 7 bala terezeden qulap, bireýi qaza tapqan, dep habarlaidy "Ult aqparat" qalalyq politsiia departamentine silteme jasap.
Mundai faktilerdiń aldyn alý maqsatynda ata-analar men eresekterdiń belgili bir erejeler men keńesterge qulaq asýyn ótinemiz:
- páterde terezeni ashyp, jeldetken kezde balanyń qaraýsyz qalmaýyn qadaǵalańyz;
- terezeni ashqan kezde 10 sm úlken etip ashpańyz, ol úshin arnaiy bekitkish qoiyńyz;
- balanyń eresektersiz jalǵyz balkonǵa shyǵýyna jol bermeńiz;
- uiyqtap jatqan balany páterde jalǵyz qaldyrmańyz, bala oianǵan soń terezege qarai barýy múmkin;
- barlyq jihazdardy bala tereze aldyna shyǵa almaityndai etip, tereze janynan alshaq qoiý kerek;
- terezeden qaraý úshin balaǵa aiaǵynyń astyna oryndyq nemese basqa nárse qoiyp úiretpeńiz;
- terezedegi moskittik torlarǵa senbeý kerek: balalar moskittik torlardy qaýipsiz dep oilap, terezege súiengendei sol torlarǵa súienedi. Eń sapaly tordyń ózi balanyń salmaǵy men qysymdy kótere almaidy.
- eger 5-12 jas aralyǵyndaǵy bala páterde jalǵyz qalýǵa qoryqsa, az ýaqytqa da qaldyrmańyz. Olar qoryqqan kezde ata-anasyn kóremin dep terezeden nemese balkonnan qarap, qulap ketýi múmkin.
