Nur-Sultan qalasy ákiminiń orynbasary Asqar Amrin qyzmetinen ketti. Ol bul týraly óziniń jelidegi paraqshasynda jazdy, dep habarlaidy QazAqparat.
«Búgin – meniń Nur-Sultan qalasy ákiminiń orynbasary retindegi sońǵy jumys kúnim. 5 jyl 4 ai – az ýaqyt emes, bul meniń ómirim men mansabymdaǵy mańyzdy kezeń. Birinshi kezekte elorda turǵyndaryna jáne qyzmet babymen azamattardy qabyldaýda, qalany aralaýlarda, halyqtyń arasynda, «Januia» ortalyǵynda, obektilerde birge jumys jasaǵan, tildesken, máselelerdi sheshisken barsha janǵa alǵysymdy aitamyn. Bul – baǵa jetpes ómirlik tájiribe.
Men ekonomika jáne quqyq qorǵaý organdary máselelerine, sonymen qatar úlestik qurylystyń problemaly obektileriniń qarjylandyrylýyn qamtamasyz etý máselelerine jetekshilik ettim. Problemaly obekt úleskerlerine aitpaǵym: biz sizdermen birge úlken jumys atqardyq: obektilerdiń kópshiligi tapsyryldy, úleskerler óz kiletterin aldy, belgili bir ýaqytty qajet etetin qujattardy rásimdeý isteri ǵana qalyp otyr. EQK ári qarai da problemaly obektilerdi aiaqtaý boiynsha óz jumysyn jalǵastyrady jáne jáne sizder de kópten kútken úilerińizge qol jetkizesizder!» - dep jazdy Asqar Amrin.
Sonymen qatar ol memlekettik qyzmet ózektiligin joǵaltýda ekenine toqtaldy.
«Memlekettik qyzmet – bul úlken eńbek. Mysaly, aýdandyq inspektor kúndelikti óz aýdanyn aralap, bir qaraǵanda kózge baiqala bermeitin kúrdeli jumys atqarady. Bálkim ózgerýimiz qajet shyǵar, ashyǵyraq bolyp, táýlik boiy atqaryp júrgen jumysty kóbirek jariialaý kerek shyǵar, tek popýlizmnen aýlaq bolyńyzdar. Sizge jáne otbasylaryńyzǵa shydamdylyq, densaýlyq jáne amandyq tileimin»,- dep tolyqtyrdy jazbasyn.
