Keshe «Nur Otan» partiiasynyń Saiasi taldaý jáne strategiialyq zertteýler ortalyǵyn jurtshylyqqa tanystyrý rásimi ótti. Memleket basshysynyń tapsyrmasymen ashylǵan ortalyq partiia qyzmetterine taldaý jasaýdy qamtamasyz etedi.
Ortalyqtyq ashylý saltanatynda partiia Tóraǵasynyń birinshi orynbasary Muhtar Qul-Muhammed: «2016 jyldyń 6 mamyrynda ótken «Nur Otan» partiiasy Saiasi keńesiniń otyrysynda Nursultan Nazarbaev jetekshi saiasi kúsh retinde partiianyń ideialar generatory bolýy kerektigin, ol úshin ózindik myqty taldaý ortalyǵyn qurý qajettigin atap ótti. Búginde bizder Elbasymyzdyń tapsyrmasyn sátti júzege asyrdyq dep maqtanyshpen aita alamyz», – dedi.
Sonymen qatar, ol: «Belgili «oi fabrikalaryn» júzege asyrýdyń álemdik tájiribesin jan-jaqty zertteý negizinde búgin jańa ortalyq óz jumysyn bastaidy. Osyǵan orai, biz álemniń damyǵan elderindegi eń jetekshi partiialardyń analitikalyq qurylymdarynyń jumysyn saralai kelip, sizderdiń nazarlaryńyzǵa jańa ortalyqtyń ashylǵanyn qýanyshpen habarlaimyz. Bul ortalyq Elbasymyz usynǵan qalyptasqan memlekettiń jańa saiasi, strategiialyq baǵytyn júzege asyrýdy taldamalyq jaǵynan qamtamasyz etetin bolady», – dedi.
Ortalyqty áleýmettik ǵylymdar kandidaty Iýliia Kýchinskaia basqarady. Ashylý saltanatynda ol álemde osyǵan uqsas 6500-den astam taldaý alańy bar ekenin atap ótti.
«Ózderiniń strategiialaryn jasap, áleýmettik-ekonomikalyq is-áreketterin jetildirýde, sondai-aq, saiasi sheshimder qabyldaýda saiasi partiialar taldaý materialdary men zertteý toptarynyń boljamdaryna súienedi. Endi bizde de AQSh, Ulybritaniia, Resei, Qytai, Japoniia jáne Eýropalyq odaqtyń jetekshi saiasi partiialary sekildi ózindik «oi fabrikamyz» bar», – dedi Iýliia Kýchinskaia.
Strategiialyq zertteýler ortalyǵynyń basym baǵyttary: jahandyq úderistegi Qazaqstan, jańa shynaiylyqtaǵy aqyldy ekonomika, aqparattyq qaýipsizdik, memlekettik jáne saiasi baǵdarlamalardyń nátijeliligin baqylaý, partiialyq júieniń damýy, qoǵamdyq pikirge baqylaý jáne boljaý jasaý.
Qazirdiń ózinde ortalyqta 30 taldaýshy men sarapshy jumys isteidi. Olardyń arasynda ǵylym doktorlary men kandidattary, PhD doktoranttary men magistranttary, «Bolashaq» baǵdarlamasy men Nazarbaev Ýniversitettiń túlekteri bar. Sarapshylyq qaýymdastyqpen birlesken jumys sheńberinde ortalyq «Sarap Time» pikirsaiys jáne KIPR taldaý klýbtarymen ózara qarym-qatynas jasaidy. Ortalyq janynda «Zerde» saraptama klýby bar. Bul – elimizdiń áleýmettik-ekonomikalyq jáne saiasi damýyna qatysty ózekti suraqtar boiynsha ǵalymdar men sarapshylardyń pikir-talas alańy bolyp tabylady. Shetel mamandarynyń tájiribelerin tartý úshin ortalyq janynda halyqaralyq saraptamalyq keńes qurylǵan. Keńes quramyna iri saraptamalyq «oi tresteri» men álem ýniversitetteriniń, atap aitqanda, AQSh, Ulybritaniia, Niderland, Resei, Izrail, Singapýr, Japoniia jáne Ońtústik Koreiadan ókilder kirgen.
Álisultan Qulanbai,
«Egemen Qazaqstan»
.jpeg)