Budan bylai «Nur Otan» partiiasy Elbasy bastamalarynyń júzege asyrylýyn qatań baqylaýǵa alady. Barlyq baǵyt boiynsha júieli jumys júrgizý úshin memlekettik organdarmen, úkimettik emes uiymdarmen jáne qoǵam belsendilerimen tyǵyz bailanys ornatylady. Sonyń nátijesinde atalǵan bastamalarǵa qatysty olqylyqtar der kezinde anyqtalyp, tiisti sharalar qolǵa alynbaq. Bul týraly partiia Tóraǵasynyń Birinshi orynbasary Máýlen Áshimbaev málimdedi.
Aita keteiik, búgin Prezidenttiń bes áleýmettik bastamasynyń júzege asyrylýyn baqylaý jónindegi Qoǵamdyq keńes qurylyp, onyń alǵashqy otyrysy ótti. Bul Keńestiń Elbasynyń tikeleitapsyrmasymen qurylǵanyn aitqan Máýlen Áshimbaev:
– Biz eshkimge Elbasy bastamalaryn sózbuidalyqqa salyp, kesheýletýge jol bermeimiz. Sondyqtan osyǵan qatysty málimetterdi Keńes memlekettik organdar, qoǵamdyq birlestikter, úkimettik emes uiymdar, sarapshylar jáne qarapaiym halyqpen tyǵyz jumys isteý arqyly túrli derekkózderden alyp otyrady. Halyq qajetti aqparattardy qoǵamdyq qabyldaý bólmesi, partiianyń veb-saityndaǵy arnaiy «5bastama» aidary nemese jedel jeli arqyly habarlasyp bere alady. Mundai qadam bes áleýmettik bastamany júzege asyrý kezindegi olqy tustardy der kezinde anyqtap, ony tiimdi sheshý joldaryn qarastyrýǵa múmkindik beredi, – dedi.
Sonymen qatar otyrysta Bes áleýmettik bastamanyń júzege asyrylýyn baqylaýdyń tiimdi tetikteri men osy baǵyttaǵy ózara is-qimyl barysy talqylandy. Keńes tóraǵasy bolyp Senat depýtaty Baqytjan Jumaǵulov taǵaiyndalsa, onyń jumysyn uiymdastyrýdy «Nur Otan» partiiasy qamtamasyz etedi. Iaǵni, bastamalardyń ár baǵyty boiynsha qurylǵan jumys tobynyń qyzmetin partiia hatshylary úilestiretin bolady.
Keńestiń basty mindeti – áleýmettik bastamalardyń júzege asyrylýyna qoǵamdyq monitoring júrgizip, turaqty baqylaýda ustaý. Sondai-aq baǵdarlamanyń oryndalý barysy týraly halyqqa aqparat berip, qajetti túsindirý jumystaryn uiymdastyrý. Odan bólek, Elbasy bastamalaryn júzege asyrý kezindegi máselelerdi anyqtap, tiisti memlekettik organdarǵa olardy sheshý joldaryn usyný.
Otyrysta memlekettik organdar men saiasi partiialardyń jetekshileri, qoǵamdyq birlestikter men úkimettik emes uiym ókilderi jáne bilikti sarapshylar men belsendi azamattar sóz alyp, kóterilgen taqyrypqa qatysty óz oilarymen bólisti.
.jpeg)