Saiasattanýshy Qazbek Maigeldinov Nur Otan partiiasy jaqtastarynyń ligasy jóninde pikir bildirdi, dep habarlaidy QazAqparat.
«Nur Otan partiiasy jaqtastary ligasynyń eń basty maqsaty – aýyl, aýdan, oblys ortalyqtarynda jáne qalalarda praimerizdiń ádil, ashyq ótýin qadaǵalaý, iaǵni baqylaýshy bolyp, praimerizdiń ótýine atsalysý. Sonymen birge, qazirgi ýaqytta óńirlerde jergilikti máselelerdi jaqsy biletin, máselelerdiń sheshilýine tikelei atsalysyp júrgen belsendi azamattar osy liga baqylaýshysy retinde qosylyp jatyr», - dep atap ótti sarapshy QazAqparat tilshisine bergen suhbatynda.
Sonymen birge, Q. Maigeldinov partiia jaqtastary ligasynyń qazirgi jumysyna toqtaldy.
«Aldaǵy eki kúnde liga baqylaýshylary óńirlerdi aralaityn bolady. Eń alǵashqy sapar Soltústik Qazaqstan oblysy, Qostanai oblysynda bastalyp, odan keiin – Shyǵys Qazaqstan, Ońtústik Qazaqstan, Almaty oblystarynda jalǵasady. Onda tirkeýdiń qalai júretinin, tirkeý úrdisinde qabyldaý-qabyldamaý máseleleri qalai qarastyrylyp jatqanyn tekseredi. Praimerizdiń negizgi erejesi partiia men biýro tarapynan da ashyq aitylǵan, iaǵni kez kelgen azamat aýdandyq, oblystyq, Májilis deńgeiine deiin belgiler qoiýǵa quqyly. Keiinirek saty boiynsha aýdandyq, oblystyq debattan jeńip, ári qarai daýys jinaityn bolsa, kez kelgen azamat Májilis deńgeiine deiin bara alady. Biraq jergilikti deńgeide keibir úmitkerlerge tosqaýyldar bolǵany anyqtalyp jatyr. Osyndai máselelerdi, olqylyqtardy anyqtaý úshin Liga jaqtastary óńirlerge barady. Tirkeý aiaqtalǵan soń, úgit-nasihat úrdisi bastalady», - dep túsindirdi saiasattanýshy.
Spiker qazirgi tańda eń basty másele – óńirlerdegi ákimdikter ekenin aitty.
«Ózderińiz bilesizder, aýdandyq máslihattarda jyldar boiy otyrǵan óz depýtattary bar, kásipkerler, iri sharýa qojalyqtarynyń basshylary bar. Bul tulǵalar álbette aldaǵy sailaýda óz oryndaryn saqtap qalýǵa múddeli bolady. Jáne ákimdik tarapynan osy sailaýǵa aralasý faktileri de bolýy múmkin. Praimerizge qatysýǵa tilek bildirgen kóptegen azamattar osyndai túitkildi máselelerdi aitýda. Osy úrdisterdiń aldyn alý úshin jáne praimerizdiń ashyq ádil ótýine atsalysý úshin jaqtastar ligasynyń baqylaýshylary óńirlerge barady. Áli de erikti azamattar partiianyń jaqtastar ligasynyń baqylaýshysy bolýǵa jazylsa, quba-qup bolar edi. Óitkeni, óńir tynysyn jaqsy biletin, jergilikti máselelerdi jiti qadaǵalap otyrǵan belsendiler barshylyq. Olar máselelerdi ishki jaǵynan jaqsy bilgendikten, osy azamattardyń atsalysqany durys bolady. Olarǵa halyq tarapynan senim de bolady», - dep túiindedi sózin Q. Maigeldinov.
