Shyńǵys Nurlanov «Nur Otan» partiiasyndaǵy saiasi menedjment mektebine direktor bolyp taǵaiyndaldy, dep habarlaidy "Ult aqparat".
Elbasy, «Nur Otan» partiiasynyń lideri Nursultan Nazarbaevtyń partiianyń jumysyn jandandyrý jáne kadrlardy jańartý jónindegi tapsyrmasyna sáikes, partiianyń Saiasi menedjment akademiiasy Saiasi menedjment mektebi bolyp ózgertildi. Al mekteptiń direktory bolyp «Bolashaq» baǵdarlamasynyń túlegi Shyńǵys Nurlanov taǵaiyndaldy.
«Nur Otan» partiiasynyń Saiasi keńesiniń keńeitilgen otyrysynda partiia Tóraǵasy álemniń jetekshi oqý oryndarynda memleket esebinen bilim alǵan qazaqstandyq jas mamandardy jumysqa kóbirek tartýdy tapsyrǵan bolatyn.
Shyńǵys Nurlanov Vashington ýniversitetin «saiasattaný» mamandyǵy boiynsha támamdaǵan. Nazarbaev Ýniversitetiniń «bilim berý salasyndaǵy kóshbasshylyq» mamandyǵy boiynsha magistri. Qazaq, orys, aǵylshyn jáne túrik, arab tilderin meńgergen.
Ol ár jyldar Respýblikalyq fizika-matematika mektebiniń astanalyq filialynyń meńgerýshisi, Nazarbaev Ýniversitetiniń Joǵary biznes mektebiniń konsýltanty, QR Bilim jáne ǵylym ministrliginiń Aqparattyq-saraptamalalyq ortalyǵynda bilim berý menedjmentin zertteý boiynsha jetekshi taldaýshysy, «Nur Otan» partiiasy Qoǵamdyq saiasat institýtynyń sarapshysy, Halyqaralyq yntymaqtastyq boiynsha nemis qoǵamdastyǵynyń (GIZ) kásiptik bilim boiynsha ulttyq úilestirýshisi, «Bolashaq» halyqaralyq baǵdarlamasy ortalyǵynda menedjer, oqytýshy t.b. qyzmetterin atqardy.
Saiasi menedjment mektebiniń jańa basshysyna birqatar naqty mindetter júkteldi. Atap aitqanda, partiia mamandaryn qoǵammmen bailanystyń praktikalyq daǵdylaryna, janjaldardy sheshý, mediatsiia jáne t.b. oqytý arqyly daiyndaýdy jetildirý tapsyryldy.
Aita keteiik, buǵan deiin «Aiqyn» gazetiniń bas redaktory bolyp, «Bolashaq» baǵdarlamasynyń taǵy bir túlegi Nurmuhamed Baiǵara taǵaiyndaldy. Ol bul taǵaiyndaýǵa deiin «Egemen Qazaqstan» gazeti AQ basqarma tóraǵasynyń keńesshisi, bas redaktorynyń orynbasary qyzmetin atqardy.
