«Nur Otan» partiiasynyń partiiaishilik sailaýyna qatysýǵa 3 myńnan astam azamat ótinish berdi, dep habarlaidy "Ult aqparat".
Bul málimetti búgin óziniń Facebook paraqshasynda «Nur Otan» partiiasy tóaǵasynyń birinshi orynbasary Baýyrjan Baibek jariialady.
«Qurmetti dostar! Búginde Elbasy, partiia Lideri Nursultan Nazarbaevtyń bastamasymen qolǵa alynǵan «Nur Otan»-nyń partiiaishilik sailaýyna qatysýǵa búkil el boiynsha úmitkerlerdi usyný men tirkeý júrip jatqanyn jaqsy bilesizder. Tek alǵashqy eki kúnniń ózinde 3209 azamat ótinish berdi. Olardyń 1138-i – áielder, onyń ishinde 48-i – kóp balaly ana. 788 kandidat – 35 jasqa deiingi jastar, sondai-aq 31-i – erekshe qajettilikteri bar azamat. Bastaýysh partiia uiymdary arqyly 1079 adam usynylsa, 2130 kandidat – ózin-ózi usynǵandar.
Kez kelgen sailaý protsesiniń aiqyndyǵy men legitimdiliginiń ajyramas belgileriniń biri táýelsiz baiqaýshylardyń qatysýy bolyp tabylady. Sondyqtan biz óńirlerdegi partiialyqtarmen birge jan-jaqty talqylai otyryp, baiqaýshylardyń mindetteri men ókilettikterin anyqtaityn erejeni bekittik»,-deidi Baýyrjan Baibek.
Onyń aitýynsha, sailaýda kandidattyń senim bildirgen tulǵasy (partiia múshesi) baiqaýshy bola alady. Daýys berý kúni ol daýystardy sanaý rásimderi men ýchaskelerde daýys berý qorytyndylaryn resimdeýdi baqylaýǵa, tasymaldanatyn ýrnalardyń qasynda júrýge, usynystar berýge jáne esep komissiiasynyń sheshimderi boiynsha shaǵym jasaýǵa, sondai-aq paidalanylmaǵan biýlletenderdi joiý kezinde istiń basynda bolýǵa quqyly. Foto jáne beinejazba jasaýǵa ruqsat etiledi.
Buzýshylyq faktilerin anyqtaǵan jaǵdaida baiqaýshy esep komissiiasynyń múshelerin habardar etedi. Olqylyqtar joiylmaǵan nemese negizdelgen bas tartý usynylmaǵan jaǵdaida, ol aimaqtyq jáne aýmaqtyq partiialyq baqylaý komissiiasyna shaǵymdanýǵa quqyly.
Tiisti organ bergen málimettermen kelispegen jaǵdaida, baiqaýshy shaǵymdy komek@nurotan.kz elektrondy pochtasy boiynsha Ortalyq partiialyq baqylaý komitetine joldai alady. Ol eki kún ishinde túpkilikti sheshim shyǵarýǵa mindetti. Sondai-aq 8 (800) 080 4441 arnaiy jedel jeli uiymdastyrylǵan.
«Sonymen qatar onlain-daýys berý ótkizý úshin biz otandyq IT-mamandarmen birlesip, «Praimeriz» aqparattyq júiesin ázirledik. Ol sailaý barysyna qandai da bir zańsyz aralasý nemese kenetten «irkilip» qalý yqtimaldyǵyna jol bermei, daýystardy naqty ýaqyt rejiminde sanaý múmkindigin kózdeidi.
Jalpy, qazirgi kezde ashyq ta ádil partiiaishilik sailaýdyń ótýine qajetti barlyq jaǵdai jasalǵan. Partiia Lideri Nursultan Nazarbaev praimeriz bastalar kúni atap ótkendei, bastysy – aiqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý.
Taǵy da barshańyzdy praimerizge qatysýǵa shaqyramyn»,-dep jazdy partiia tóraǵasynyń birinshi orynbasary.
Aita keteiik, partiiaishilik sailaýǵa úmitkerlerdi usyný men tirkeý merziminiń bitýine nebári bir aptadan astam ýaqyt qaldy. Baiqaýshylarǵa arnalǵan erejemen tolyǵyraq nurotan.kz jáne primaries.kz saittarynda ornalastyrylǵan nusqaýlyqtan tanysýǵa bolady.
