«Nur Otan» partiiasynyń Saiasi taldaý jáne strategiialyq zertteýler ortalyǵy «Nur Otan Talks: modernization» pikirtalas alańy aiasynda «Jańǵyrý men jańa ideialar arqyly jarqyn bolashaqqa» atty konferentsiia ótkizdi. Oǵan belgili blogerler, partiia músheleri Saiasat Nurbek, Dinara Sátjan, Rahym Oshaqbaev jáne Táńirbergen Berdońǵar qatysty. Sondai-aq, belgili sarapshy Aidos Sarym men jas rejisser, prodiýsser Nurtas Adambai da jańǵyrý jónindegi óz oilarymen bólisti.
Is-sharanyń basty ereksheligi oǵan qatysýǵa niet bildirýshiler tek internet arqyly tirkeldi. Sol sebepti konferentsiiaǵa qatysýshylar negizinen partiialyq jańǵyrý bastamasyn jan-jaqty talqylap, qashanda jańa ideialar usynýǵa daiyn turatyn áleýmettik jelilerdiń belsendi qoldanýshylary boldy.
Konferentsiianyń moderatory, «Nur Otan» partiiasy Tóraǵasy Birinshi orynbasarynyń keńesshisi Janna Qurmanǵalieva partiia músheleriniń, sarapshylardyń, qoǵam qairatkerleriniń, mass-media ókilderiniń jáne el erteńine beijai qaramaityn barsha qazaqstandyqtar qatysatyn, partiiany jańǵyrtýdyń ózekti máseleleri ashyq talqylanatyn mundai zamanaýi formattaǵy suhbattasý alańyn qurý asa mańyzy bastama ekenin aitty.
– «Álemdi ózgertkiń kelse, aldymen ózińdi ózgert» degen barshaǵa málim qaǵida bar. Sondyqtan Elbasy jariialaǵan jańǵyrý úderisiniń tiimdi nusqaýshysy bolý úshin jáne osy istiń aldyńǵy leginde qalý úshin partiia óziniń jumys formatyn ózgertýi kerek. Sondai-aq, ony ashyq aqparattyq qoǵamnyń trendterine beiimdep, zamananyń kez kelgen talabyna jaýap berýge daiyn bolýy tiis. Sol sebepti, biz búgin partiia jumysyn jańǵyrtý joldary jóninde ishki pikirtalas ótkizip otyrmyz, – dedi konferentsiianyń moderatory, «Nur Otan» partiiasy Tóraǵasy Birinshi orynbasarynyń keńesshisi Janna Qurmanǵalieva.
Aita keteiik, 3 qarasha kúni Elbasy, «Nur Otan» partiiasynyń Tóraǵasy partiia Saiasi keńesiniń keńeitilgen otyrysynda partiialyq jańǵyrýdy bastap, az ýaqytta onyń naqty josparyn jasaýdy tapsyrǵan bolatyn.
