«Nur Otan» ózekti máselelerdi oń sheshý úshin jańa jobany qolǵa aldy, dep habarlaidy "Ult aqparat".
Bul týraly búgin Ortalyq kommýnikatsiialar qyzmetinde ótken brifingte belgili boldy.
Partiiasy Tóraǵasynyń Birinshi orynbasary Máýlen Áshimbaev halyqtyń ózekti áleýmettik máselelerin sheshýge baǵyttalǵan «Halyqqa kómek» jobasy Elbasynyń tikelei bastamasymen qolǵa alynǵanyn aitty.
– Memleket basshysy «Nur Otan» partiiasynyń kezekti XVIII sezinde halyqtyń basyndaǵy jáne qoǵamdaǵy ózekti máselelerge qatysty jedel áreket etý kerektigin aityp, «Halyqqa kómek» jobasyn júzege asyrýdy tapsyrǵan bolatyn. Partiia jańa bastamany memlekettik organdarmen, úkimettik emes uiymdarmen jáne biznes qaýymdastyqpen birlesip iske asyrady, – dedi Máýlen Áshimbaev.
Joba negizinde partiianyń elimizdegi barlyq qoǵamdyq qabyldaý bólmeleriniń jumysy jańǵyryp, olar Biryńǵai áleýmettik tereze júiesinde qyzmet kórsete bastady. Sondai-aq atalǵan bastama aiasynda qoǵamdaǵy ózekti máselelerdi jedel ári tiimdi sheshý úshin buqaralyq aqparat quraldary men áleýmettik jelilerge jariialanǵan jazbalarǵa taldaý jasalyp, aldyn alý monitoringi júrgiziledi. Sonyń nátijesinde qoǵamdyq qabyldaý bólmeleri «jedel ári bir jerde» qaǵidasy boiynsha jumys isteidi.
– Qazirgi tańda «Nur Otan» partiiasy halyqtyń múddesin qorǵaityn jáne Elbasy tapsyrmalarynyń oryndalýyna baqylaý júrgizetin basty institýt bolyp tabylady. «Halyqqa kómek» jobasyn jemisti júzege asyrý úshin qoǵamdyq qabyldaý bólmelerimen birge bastaýysh partiia uiymdarynyń da áleýetin paidalanamyz. Óitkeni bizdiń basty mindetimiz – halyqtyń máselesin tiimdi sheshýge yqpal etý, – dedi Máýlen Áshimbaev.
