«Nur Otan» partiiasy tóraǵasynyń birinshi orynbasary Baýyrjan Baibek elimizdiń túrli aimaǵyna baryp, turǵyndarmen kezdesýin jalǵastyryp jatyr. Osy aptada ol Jambyl oblysynyń birqatar eldi mekenine, sonyń ishinde Jýaly jáne Qordai aýdandaryna bardy, dep habarlaidy "Ult aqparat".
Elbasynyń tapsyrmasyna sáikes, «Nur Otan» partiiasy aldaǵy 5 jyl úshin ár oblys, aýdan men eldi mekendi damytý boiynsha arnaiy usynystar ázirleýde. Partiianyń 216 aimaqtyq baǵdarlamasynda aimaqtardyń jergilikti erekshelikterin eskere otyryp, qajettilikteri men máseleleri kórinis tabýy tiis ári olardy sheshýdiń naqty joldary da kórsetiledi. Sondyqtan Baýyrjan Baibek issaparynyń alǵashqy kúninde azamattyq qoǵam ókilderimen, sonyń ishinde ziialy qaýymmen, bilim berý jáne ózge de sala qyzmetkerlerimen kezdesti.
«B.Momyshuly aýylynda kásipker áieldermen birge aýylda mikrobiznesti damytý máselelerin talqyladyq. Memleket tarapynan kórsetilgen qoldaýdyń arqasynda óz kásibin ashqandardyń arasynda kópbalaly analar da barshylyq. Búginde olar óz otbasylaryn qamtamasyz etip qana qoimai, jańa jumys oryndaryn ashyp, salyq tólep, sondai-aq qoǵamdyq ómirge de belsene atsalysýda. Dál osyndai belsendi azamattyq ustanymy bar áielder ártúrli áleýmettik toptardyń múddelerin bildirýi jáne aldaǵy partiiaishilik praimerizge qatysýy tiis dep sanaimyn. Partiia kóshbasshysy Nursultan Nazarbaevtyń bastamasy boiynsha, Nur Otan aldaǵy ýaqytta óz sailaýaldy partiialyq tizimderi arqyly Májilis pen barlyq deńgeidegi máslihattarǵa keminde 30% áielderdiń kandidatýrasyn usynýdy josparlap otyr», – dep jazdy B.Baibek Instagram-daǵy paraqshasynda.
Partiia Tóraǵasynyń Birinshi orynbasary atap ótken belsendi áielderdiń qataryna kópbalaly ana Ásima Shókeevany qosýǵa bolady. Qazirgi tańda Jýaly aýdandyq isker áielder qaýymdastyǵyn basqaryp otyrǵan Á. Shókeeva birneshe jyl buryn sharýa qojalyǵyn ashqan. Keiin óz qarjysyna balabaqsha salyp, kópbalaly jáne áleýmettik jaǵdaiy tómen otbasylardyń balalaryn tegin aspen qamtamasyz etip otyr.
«Mine, bul – barshamyz úshin tamasha úlgi. Bir ǵana áiel aýyl sharýashylyǵyn, kásipkerlikti jáne bilim berý salasyn damytyp otyr. Qanshama adamǵa jumys berip otyrǵany taǵy bar. Bul eldegi – tynyshtyqtyń kepili», – dep atap ótti Jambyl oblysynyń ákimi Berdibek Saparbaev kezdesýde.
Sonymen qatar ol oblystaǵy kásipkerlik salasynda 125 myńnan astam adam eńbek etse, olardyń teń jartysy áielder ekenin aitty.
Jambyl oblysyna jasaǵan issaparynyń ekinshi kúni Baýyrjan Baibek Masanshy, Ótegen men Qordai aýyldarynyń turǵyndarymen, «Nur Otan» partiiasy Qordai aýdandyq bastaýysh partiia uiymdary múshelerimen jáne depýtattarmen kezdesti.
«Munda jaqynda oryn alǵan oqiǵa tek halyqtyń aýyzbirshiligi men qoǵamdyq kelisim ǵana elimizdiń ósip-órkendeýi men tabysty damýynyń negizgi kepili ekenin taǵy bir ret esimizge saldy. Qordai aýdanyna arnaiy kelgen saparynda Memleket basshysy Qasym-Jomart Toqaev aitqandai, «Qazaqstan – dostyqtyń, beibitshilik pen kelisimniń, sondai-aq, barlyq etnikalyq toptardyń ortaq Otany.Elimiz túrli tarihi jaǵdailarǵa bailanysty qiyn-qystaý zamanda májbúrli túrde qazaq jerin panalap kelgen halyqtyń bárin qushaq jaia qarsy aldy. Biz birtutas ult retinde osy ótken kúnderden sabaq alýymyz kerek. Eń bastysy, bolashaqta mundai qaiǵyly jaǵdailardyń qaitalanbaýy úshin qoldan kelgenniń bárin jasaýymyz qajet», – dedi kópshilikpen kezdesý kezinde Baýyrjan Baibek.
Jiynǵa qatysqan jergilikti turǵyndar aýdanda jaǵdaidyń turaqtaǵanyn, azamattardy qazir qarapaiym turmystyq máseleler, atap aitqanda gazdandyrý, sýmen qamtý, mektepke deiingi mekemeler men mektep qurylysy tárizdi dúnieler alańdatatynyn aitty. Bul máselelerdiń barlyǵyn «Nur Otan» partiiasy óz baqylaýyna alady.
«Biz, qarashailar, bir zamandarda Qazaqstanǵa kúshpen jer aýdarylǵanbyz. Biraq dál osy jerden biz óz Otanymyzdy taptyq, bizdiń basymyzdan ótken qiyn kúnderdiń, deportatsiianyń taýqymetin jeńýge aqkóńil, qaiyrymdy qazaq halqy járdemdesti. Sóitip, biz osy ólkede máńgi qaldyq. Men elimdi, Otanym – Qazaqstandy súiemin. Osynda ómir súrip jatqanymdy maqtan tutamyn», dedi kezdesý kezinde Sortóbe aýyly aýrýhanasynyń dárigeri Tatiana Apaeva.
Jergilikti biliktiń aitýynsha, jýyq arada aýdannyń infraqurylymyn jańartý, jańa úsh mekteptiń, úi kezeginde turǵandarǵa arnalǵan 50 páterli turǵyn úidiń qurylysy jáne ózge de ister bastalmaq. Atap aitqanda, Masanshy aýylynda biyl 600 oryndyq mektep salý josparlanypty. Bul óz kezeginde osy mektepterdiń oryn jetispeýshiligi máseleni sheshetin bolady.
