QR Tuńǵysh Prezidentiniń tóraǵalyǵymen «Nur Otan» partiiasy Saiasi keńesi Biýrosynyń otyrysy ótti, dep habarlaidy "Ult aqparat" Elbasy.kz saityna silteme jasap.
Otyrys barysynda 18 naýryzda ótetin partiianyń Saiasi keńesi otyrystyń kún tártibi talqylandy.
Elbasy Biýro otyrysyn ashyp, partiianyń qaita jańǵyrý baǵdarlamasy men «Baqytty otbasy», «Ardagerlerdi ardaqtaiyq», «Kedergisiz keleshek» áleýmettik jobalaryn júzege asyrý barysyn maquldady.
Sonymen birge Nursultan Nazarbaev el óńirlerindegi partiia jumysyna nazar aýdardy.
«Partiia basshylyǵy, Májilis pen máslihat depýtattary óńirlerge, sonyń ishinde shalǵai aýdandarǵa barýy kerek. Halyqpen kezdesińizder, máselelerin sheshińizder. Barlyq osy máseleler aimaqtyq partiia baǵdarlamalarynda kórinis tabýy tiis», - dedi partiia tóraǵasy.
Sonymen birge, Biýro otyrysynda 30 naýryz ben 16 mamyr aralyǵynda partiianyń ishki irikteýin ótkizý týraly sheshim qabyldandy.
«Muny óte durys shara dep esepteimin, bul partiianyń atynan ózekti máselelerdi sheshetin eń belsendi jáne senimdi múshelerdi anyqtaýǵa múmkindik beredi», - dedi Elbasy.
Otyrys qorytyndysy boiynsha ishki irikteýdi júrgizý erejesiniń jobasyn aldyn ala maquldaý jóninde Biýro qarary qabyldandy. Saiasi keńestiń otyrysynda joba bekitiledi.
Sonymen birge, otyrysta partiianyń sybailas jemqorlyqqa qarsy 2025 jylǵa deiingi baǵdarlamasyn júzege asyrýdyń Jol kartasy bekitildi.
