«Nur Otan» partiiasy Densaýlyq saqtaý jáne Eńbek vitse-ministrlerine shara qoldanýdy talap etti, dep habarlaidy "Ult aqparat" partiianyń baspasóz qyzmetine silteme jasap.
Qazaqstanda koronavirýstyq infektsiiadan 186 meditsina qyzmetkeri qaitys boldy. Alaida qaza tapqandardyń tek 9-ynyń otbasyna ǵana ótemaqy tólengen. Mundai kóńil júdetetin statistika búgin «Nur Otan» Partiialyq baqylaý komitetiniń otyrysynda jariia etildi. Partiialyqtar COVID-ben kúres boiynsha epidemiiaǵa qarsy is-sharalarǵa tartylǵan dárigerlerge ai saiynǵy jalaqyǵa qosymsha ústemeaqy tóleý, sondai-aq osy indetti juqtyrǵan nemese sodan qaitys bolǵan jaǵdaida meditsina qyzmetkerlerine ótemaqy tóleý máselelerin qarady.
Sonymen, Partiialyq baqylaý komitetiniń tóraǵasy Pavel Kazantsev áleýmettik meditsinalyq saqtandyrý qorynan búginge deiin infektsiia juqtyrǵan 1093 dáriger ǵana 2 mln. teńgeden ótemaqy alǵanyna toqtaldy. Al sol kezde, naýqastanǵan meditsina qyzmetkerleriniń jalpy sany 11293 adamdy qurady.
«El prezidenti Qasym-Jomart Kemeluly Toqaev óziniń Qazaqstan halqyna Joldaýynda pandemiia týyndatqan daǵdarys bizdi kóp nársege úiretkenin atap ótti. Máselen, dárigerdiń eńbegin baǵalai bilý, onyń mańyzdylyǵyn kúsheitý úshin materialdyq turǵydan qoldaý kerek. Qazaqstan Respýblikasynyń Eńbek jáne halyqty áleýmettik qorǵaý ministri men Densaýlyq saqtaý ministriniń birlesken buiryǵy 9 sáýirde qabyldanyp qoiǵanyna qaramastan, ótemaqy tóleý jónindegi óńirlik komissiialardyń alǵashqy otyrystary tek tamyz aiynda ótti. Meditsina qyzmetkerleriniń indet juqtyrýynyń alǵashqy jaǵdailary naýryz aiynda oryn alǵan bolsa, bul máseleni osynsha sozbalańǵa salýdyń sebebi nede?! Aimaqtyq partiialyq baqylaý komissiialary biýrokratiia men sózbuidaǵa salý faktilerin qarap, kináli partiia múshelerin eń qatań jaýapkershilik sharalaryna tartýy kerek», - dedi Pavel Kazantsev.
Densaýlyq saqtaý vitse-ministri Liýdmila Biýrabekovanyń aitýynsha, qazirgi ýaqytta infektsiia juqtyrýshylardy 3 topqa bólgen. Osy maqsatqa respýblikalyq biýdjetten 3 ai merzimge qarajat qaralypty. Ústemeaqy naqty jumys istegen kezeń úshin ai saiyn esepteledi.
Óz kezeginde QR Eńbek jáne halyqty áleýmettik qorǵaý vitse-ministri Erbol Ospanov ústemaqy tóleýden bas tartýdyń negizgi sebepteri retinde indetti qaidan juqtyrǵanyn kórsetpeý nemese ony juqtyrýdyń jumys barysynda oryn almaýy, derekterdi qate kórsetý jáne basqalardy atady.
«Ulttyq ǵylymi meditsinalyq ortalyq» AQ basqarma tóraǵasy, belgili pýlmanolog Abai Baigenjin de qosymsha tólemderge qatysty mańyzdy másele kóterdi. Ol UǴMO-tyń 2 ai boiy juqpaly aýrýlar klinikasy retinde jumys istegenin, naýqastar táýlik boiy qabyldanǵanyn, al qosymsha jumys úshin Densaýlyq saqtaý ministrliginen ústemeaqy túspegenin aitty.
«Tájiribemizdi eskerip, bizge eń aýyr naýqastar jetkizildi. Bizdiń dárigerler, medbikeler, sanitarlar, táýlik boiy jumys istedi, óitkeni naýqastardy emdeý kerek. Jumys stavkasy týraly oilaǵan da joqpyz. Ulttyq ortalyq bolǵandyqtan, bizde qarjylyq resýrstar bar, men shyǵyndardy ortalyq esebinen japtym. Al bul aqshany qaitarý úshin Densaýlyq saqtaý ministrligine júgingengenimizde, bizge bul sizderdiń shyǵyndaryńyz, biz ony qaitarmaimyz dedi. Óńirlerdegi áriptesterimniń jaǵdaiy qanshalyqty qiyn bolǵanyn jaqsy túsinemin. Olardyń jaǵdaiy bizden on ese aýyr. Ústemaqy tóleý sonshalyqty qiyn ba?», - dedi Abai Baigenjin.
PBK múshesi, Májilis depýtaty Murat Temirjanov aimaqtarda oryn alǵan aýyr jaǵdailardyń bir kórinisi retinde Kókshetaý qalasyndaǵy meditsinalyq mekemeni mysalǵa keltirdi. Mundaǵy meditsina qyzmetkerleriniń jumys kúniniń basynda jáne jumystan soń IFA (qannyń immýnofermenttik taldaýy) ádisimen qajetti testileýden ótýge múmkindikteri bolmaǵan.
«Kókshetaý aýrýhanasynadaǵy kezekshilik aýysymnyń qalai júzege asatynyn óz kózimmen kórdim. Adamdar avtobýsqa otyrdy da, úidi-úiine ketip qaldy. Oblystyq densaýlyq saqtaý basqarmasynan nege olardyń aldymen testileýden ótpeitinin suradym. Sóitsek, Kókshetaýdaǵy jeke menshik zerthanalarda da, memlekettik zerthanalarda da IFA ádisimen tekserý júrgizilmeitin bolyp shyqty. Shyn máninde, osy 4-5 ai boiy olar bas sanitarlyq dárigerdiń qaýlysyn buzdy. Sonda sizder (Densaýlyq saqtaý ministrligine qaratyp aityp otyr) olardyń qaisysy jumysqa basqa jerden aýrý juqtyryp kelgenin, qaisysy kezekshilik aýysymyn atqarý barysynda juqtyryp alǵanyn qalai anyqtadyńyzdar? Indetti kimniń qai jerden juqtyrǵanyn qalai anyqtaýǵa bolady?», - dedi Murat Temirjanov.
Partiialyqtar QR DSM janyndaǵy «Respýblikalyq elektrondyq densaýlyq saqtaý ortalyǵy» ShJQ RMK qyzmetine jeke toqtaldy. Partbaqylaý komitetiniń málimeti boiynsha, «Mapcovid» júiesin Eńbek ministrliginiń Aqparattyq júiesimen integratsiialaný protsesine bailanysty qatelikter oryn alyp otyr. Júie statsionarda emdelmegen, biraq ambýlatoriialyq em qabyldaǵan meditsina qyzmetkerleriniń qujattaryn qabyldamaidy (júie «Diagnoz tabylmady» degen qate tabady).
«Bul nege burynyraq jasalyp qoimaǵan? Tehnikalyq turǵydan bul sonshalyqty qiyn ba álde ony sheshý endi ǵana qolǵa alynyp jatyr ma? Qarapaiym nárse ǵoi. Excel-degi birneshe kesteni bir jerge jinaý kez kelgen stýdenttiń de qolynan keledi! Al munda osyny bútindei bir ShJQ RMK atqara almai otyr. Bul ne sonda qasarysý ma álde beiqamdyq pa?», - dedi Pavel Kazantsev.
Otyrys sońynda partiialyq baqylaý komiteti densaýlyq saqtaý vitse-ministri Liýdmila Biýrabekovany jáne eńbek vitse-ministri Erbol Ospanovty sógis túrindegi partiialyq jaýapkershilikke tartýdy usyndy.
Eńbek ministrligi men Densaýlyq saqtaý ministrliginiń ókilderi bolsa, ótemaqy tóleý máselesi osy jyldyń 14 qyrkúiegine deiin sheshiletinine sendirdi.
